I League nomawi inchuhin a vawrtawp thleng dawn

Season liam taa Aizawl FC-in I League nomawi an chawi ṭum ang thoin tun season-ah pawh champion tuma inum boruak a sang a, Mizo mipui tana a danglamna erawh nomawi inchuhnaah hian champion lai Mizo club an tel ve tawh lo.

Zirtawp zana Minerva Punjab-in Chennai City an hneh loh avangin vawiin tlai dar 5:30-a Shillong Lajong mikhual tur East Bengal chu champion turin an dinhmun a ṭha ber a. Club pali Minerva, Neroca, Mohun Bagan leh East Bengal te chu la champion thei vek an ni.

Minerva-in nomawi an thlauh?
Season bul ṭan ṭha Minerva Punjab chu boruak sangah an talbuai a, match hnuhnung pasarihah vawi hnih chiah an chak a, vawi li chak loin vawi khat dang an inhnehtawk.

Minerva hian an elpui East Bengal chu khualmualah draw thei mah se an mualah an hneh lo a, table hnuai lama awm Churchill Brothers, Gokulam Kerala leh Chennai City te an hneh a, match hnuhnung pasarihah hian North East club pahnih Shillong Lajong leh Aizawl FC te chiah an hneh a ni.

Zirtawp zana Coimbatore-a inkhelah hian Michael Soosairaj hmangin minute 5-na lek-ah Chennai City-in goal an khung nghal a. Chencho Gyseltshen hmangin minute 26-naah Minerva-in sut mah se South Indian club tan Serbian striker Aleksandar Rakic-a'n minute 60-naah chakna goal a khung.

Inkhelh banah Minerva coach Khogen Singh chuan, "Player 11-in player 14 kan hmachhawn a, engtin nge kan chak theih ang. An goal hnihna kha chiang takin a offside a, assistant referee dinna kha a dik lo a, engtin nge a hmuh theih ang. Referee thutlukna khan engkim a thlak a ni," tiin a sawi.

Vanglaini chuan hemi chungchang hi Khogen Singh zawt zuiin Minerva coach chuan, "Referee te hian an theih ang tawka ṭhain an ham a, ṭan lam an nei ka ti lo. An theihnain a tlin lo a, amaherawhchu champion tur zawnna a nih tawh avangin tun aia ṭha hi chu ka beisei a ni," a ti.

Minerva hian Chennai City lakah hian point hlawh chhuak se chuan an match hnu-hnung bera Churchill Brothers an hneh chuan an champion dawn a, tunah erawh club dang result-ah an innghah a ṭul ta.

Khalid-a vanneihna?
Season liam taa mak taka Aizawl FC champion puitu Khalid Jamil chu season zawna champion turin a dinhmun a ṭha hle. Amaherawhchu East Bengal leh nomawi inkarah match hnih hautak zet a la awm.

Shillong Lajong hian Kolkata club hi an hneh lo a, Gokulam-in Bagan an hneh chuan Kerala club hi parukna an ni ang a, North East club hian Super Cup khel turin playoff an khelh a ṭul dawn. Hei vang hian Lajong hian East Bengal lakah an theihna zawng zawng an chhuah a ṭul ang.

Khalid-a'n season liam ta khan Shillong Lajong khelmualah hian an mamawh tawk point khat chu harsa takin a hlawh chhuak tawh a, tun ṭumah hian point thum mamawh tawh mah se club ṭha zawk a enkawl a, a harsat dan a inang tawkah a ngaih theih. Indian football ngaihven ten vawiin tlai inkhel hi an ngaihven dawn a, eng result pawh thleng se I League champion tur erawh team pali tho an ni ang.

Fixture an thlak!
March 8, Ninganiah I League khelh zawh a ni dawn a, champion thei zinga Mohun Bagan an tel takah chuan Kolkata club hian Gokulam nena naktuka an inkhel tur chu Ningania sawn an dil. He thu ziah lai hian I League thuneituten official-in la puangzar lo mah se Gokulam coach Bino George chuan an inkhelh hun tur hi March 8 a nih tur thu a sawi tawh.

Hemi hma hian fixture ṭhenkhat tih dang

-lam a ni tawh bawk a, I League tawp ni hian champion thei team pali te chuan match an nei vek dawn tihna a ni a, a hun inrual chiahin an khel bawk ang. Tun dinmunah chuan inkhelh hun hi tlai dar 3:00 a ni a, I League thuneituten an thlak danglam thei thung.

Tu nge tla dawn?
I League-ah hian sawi lawk theih loh thil tam tak a awm a, chung zinga langsar chu relegate tawh Aizawl FC chu khelh phalsak leh niin an champion zui bawk.

Season tawp nan match li chauh awm tawh mah se tla tur hi a la hriat chuang loh. India ram rawlthar ṭha rual Indian Arrows leh in lei tling Gokulam Kerala te chu tun season ṭan hmaa tla thei lo an ni. Chennai City hi season hmasaa inlei tling niin an kum khatnaah khan tla thei lo an ni a, kuminah erawh relegate thei tawh tura ngaih an ni.

Amaherawhchu South Indian club hian I League thuneitute hnehah relegate theih lohna an dil a, an phalsak em tih a la hriat loh. Chennai City awm dan tur a la hriat loh avangin Churchill Brothers hmalam hun a la chiang lo.

Chennai City hi tla thei an nih chuan Churchill Brothers-in an match hnuhnung bera Mohun Bagan an hneh chuan an him ang, amaherawhchu South Indian club hi an relegate thei lo a nih chuan Goan club hian an match hnuhnung berah eng result pawh hlawh chhuak se division hniam zawkah an tla dawn tho tihna a ni.