Inelna ṭhulh duh zingah Federer

Tennis season kal lai chu coronavirus vangin an chawl mek a, mipa tennis thuneitu sang Association of Tennis Professionals (ATP) board member zinga pakhat Mark Knowles chuan inelna an chawlh turah player lamin rawtna an siam thu a sawi.

Indian Wells khelh hmabakin an awm a, inelna an neih dawn hun tepter tawh takah ṭhulh a ni, ṭhulh a nih bakah hian March thla chhunga tournament neih tur pawh an nei thei dawn lo vek, clay court season bul ṭanna pawh a tlai dawn tihna a ni bawk.

Tennis player inkhel lai intelkhawmna 'ATP Player Council' ah member 12 an awm a, an hruaitu chu Novak Djokovic a ni, an zingah hian Roger Federer leh Rafael Nadal te an awm bawk - 'Big Three' te hi tournament ṭhulh duh zinga mi an ni.

Knowles chuan, "ATP Tour chuan kan hmabak chawlhkar ruk chhung chu eng inelna mah nei lo turin thutlukna a siam tawh a ni a, a hnuah kan dinhmun thlir chungin kan awm zel dan chu kan ngaihtuah chauh dawn. "Player ṭhenṭhat chuan inelna kan nei thei lo tur hi mak an tiin sawisel pawl pawh an awm. Amaherawhchu, player tam zawk leh tawnhriat nei ṭha, hma hun thui tak thlir tute chuan hetianga thutlukna kan siam hi mak an ti lo, an hnen aṭangin rawtna kan dawng zawk hial a ni," tiin a sawi.

Tennis season kal laia Australian Open chu inelna lian an khelh awmchhun a la ni rih; Grand Slam dawta an ngaihhlut Masters 1,000 inelna zingah chuan Indian Wells hi an ṭhulh hmasak ber a ni. May thla tawp lam aṭanga khelh ṭan tur French Open chu harsatna awm loa khelh theih beisei mek a ni thung.