Kulikawn-in Ramhlun Venglai an ngam

Mapuia Cricket League-a an match hmasa berah Kulikawn CC-in Chhinga Veng lakah hnehna chang zo lo mah se an match hnihnaah an insiamṭha nghal a, Ramhlun Venglai chu wicket thumin an hneh - RVL tan erawh match hnih an khelh tawha an vawi hnih tlawmna a ni thung.

Suaka Cricket Ground-a inkhelah Ramhlun Venglaiin bat hmasak an thlang a, an tifuh tawk lo - Lahruaitluanga'n run 36 a vaw chhuak tih loh chu batsman dang an che hleithei lo a, Kulikawn bowler Laledenthara an ngam lo. Man of the match atana thlan zui spinner hian over li a vawmah run 14 lek pein wicket thum a rawn la a, RVL hi over 19-ah run 97 chiah siamin an out vek.

Target ngaihtuahin Kulikawn hi awlsam taka chak thei tura ngaih an ni a, an beisei ang ngawt erawh a ni lo - batsman zingah Parvez Ahmed (34 runs) chiah pangngai taka bat a awm a, chutihruala an vanneihna erawh RVL bowling a ni. Ramhlun Venglai hian 'byes' hmang ringawtin Kulikawn hi run 44 an 'khilai' a, Kulikawnin over 18.5-ah an target umphain wicket sarih an hloh.