A ṭul chuan nakkum January thleng kan tlan ang - FIM President

Federation Internationale de Motocyclisme (FIM) president Jorge Viegas chuan coronavirus vanga buaina chu tawrh chhuah ngei an tum tih a sawi a, bike intlansiakna sang MotoGP chu season tih tawi ai chuan a ṭul a nih chuan nakkum January thla thleng pawha an tlan mai tur thu a sawi.

MotoGP hian hri leng vangin an season ṭan hun chu an sawn tawh a, May thla tira tlan tur Spanish Grand Prix chu a hmasa ber tura ngaih a ni. Inelna hi vawi 19 neih tur a ni a, calendar siamsa ang chuan November thla a zawh tur a ni, a bul ṭan hun an tlai vangin a hun pangngaiah chuan an zo thei dawn lo tih a chiang tawh.

FIM president Viegas chuan inelna puitling nei tur chuan vawi 13 tal intlansiak a ṭul tih a sawi a, chutihrualin ram ṭhenkhata tlan loh ngawt chu a fuh lo niin a hria, "Inelna ṭhenkhat a hun kan sawn leh kan tlan theih lohte hi a tawp lama tlan pawh a ngai mai thei.

"World championship hi a ṭha leh him thei ang bera kalpui kan tum, a ṭul a nih chuan nakkum January thla thleng pawhin inelna kan nei mai ang," tiin harsatna sukiang tur chuan theihtawp an chhuah tur thu a sawi.

Italy-ah chuan Ducati chuan an sumdawnna hmun an khar tawh a, Formula 1 team hlun Ferrari leh Lamborghini te pawhin a rei lo berah March thla chhung tal chu an inkharkhip tur thu an sawi tawh bawk.

Viegas chuan, "Dawr an khar a, zirna in leh sumdawnna hmun hrang hrang khar vek a ni bawk, a nihna takah chuan kan dinhmun tak pawh hi sawi thiam a harsa a ni, nakinah erawh heng harsatnate hi a la kiang ngei ang tih ka ring," a ti.