Euro 2021 European Championship khelh hun sawn a ni

Euro 2020 a awm dawn lo, Euro 2021 a ni dawn. Coronavirus avangin European Championship khelh hun chu kum khata sawn hlat a ni.

Nimin khan UEFA chuan  'video confe­rence call' hmangin a hnuaia member 55 te, European Club Association te, European League-a thuneitute leh FIFPro World Players' Union aiawhte nen meeting an nei. Norwegian FA chuan UEFA European Football Championship neih tur chu nakkum June 11 - July 11-ah sawn a nih thu an puang.

UEFA chuan meeting neih zawh hian thutlukna hi executive committee-in a nemngheh zawhah puan a tum a, amaherawhchu Norwegian FA-in twitter kaltlangin thutlukna hi UEFA an puan khalh. Europe thuneitu sang ber hian he thuziah lai hian thuchhuah an la siam lo.

Euro C'ship hi ruahman dan chuan kumin June 12 - July 12 chhunga neih tur a ni a, ram pakhat chauhin inelna hi thleng loin inelna thleng tur hian ram 12 an thlang. 

Inelna neihna tur khawpui 12 chu London (Wembley Stadium), Munich (Allianz Arena), Rome (Stadio Olimpico), Baku (Olympic Stadium), Saint Petersburg (Krestovsky Stadium), Bucharest (Arena Nationala), Bilbao (San Mames), Glasgow (Hampden Park), Dublin (Aviva Stadium), Copenhagen (Parken Stadium), Amsterdam (Johan Cruyff Arena) leh Budapest (Puskás Arena) te a ni. Euro C'ship hi khawpui 12-ah khelh tur a la ni tho dawn a, inkhelh hun erawh kum khata sawn hlat a ni ta thung.

Inelna thleng tur zingah England-in fixtures ṭha an chang a, semifinal leh final pawh Wembley Stadium-ah khelh a ni dawn. Hetia sawn a nih takah chuan nakkuma England thlen tur UEFA Women's Championship nen a inhnaih dawn hle. Women's C'ship hi July 7 - August 1, 2021-a khelh tur a ni.

Nations League Playoff pawh ruahmanna awmsaah chuan June 2-6, 2021-a khelh tur a ni a, Under 21 Championship pawh  June 9-26, 2021 khelh tur niin World Club Cup pawh June 2021-a khelh tur a ni a. UEFA hnuai inelna zinga hlu ber Euro C'ship sawn a nih takah chuan inelna tenau zawk khelh hun hi her danglam a ṭul a rinawm.

Euro C'ship khelh hun sawn a nih chhan hi UEFA hnuaia club inelna lian Champions League leh Europa League khelh zawh a nih theih nan te, Europe-a ram hrang hrangten an league ṭheuh an khelh zawh theih nana tih a ni.

Tunah hian Premier League leh La Liga chu April 4 thleng chawlh a nih thu an puang tawh a, Bundesliga pawh April 2 thleng chawlh a ni a, Ligue 1 pawh an chawl lailawk. Europe zinga tuar na ber Italy tan Serie A kalpui theih a ni lo bawk.

Hetia UEFA-in thutlukna a siam tak avang hian football inelna hi ruahmanna angin kalpui chhunzawm tur tihna a la ni lo a, coronavirus hnathawh danin football hmalam hun hi a hril thui khawp ang.