Atletico hnehtu Barcelona an champion tawh?

Barcelona chuan Pathianni zan khan 1-0 in Atletico Madrid an hneh a, La Liga nomawi inchuhna a tawp thawthangah a ngaih theih. Barca hnaih bertu Atletico hian point riatin hmahruaitu hi an phak lo.

Catalan club ropuina chu ṭum dang ang bawkin Lionel Messi a ni a, Argentine forward hian freekick ropui hmangin he inkhela goal awm chhun hi a khung. Messi-a'n a match hnuhnung pathumah freekick a pet lut vek a, goal 'cial' vek a ni.

Barcelona-in Pep Guardiola (2009) leh Luis Enrique (2015) enkawlna hnuaia an khelh laiin treble champion dinhmun an lo luah tawh a, Ernesto Valverde naute treble chawi turin an dinhmun a ṭha hle - Copa del Rey final an lut tawh a, Champions League last 16-ah Chelsea an la mikhual leh dawn bawk.

Barca ropuina
Nou Camp-a team pahnih intawn hmain Barcelona leh Atletico inthlauhna chu point nga chauh a ni. Diego Simeone nauten hnehna an chan chuan team pahnih inthlauhna hi point hnih a ni thei dawn - khawvelin he inkhel hi a ngaihven a, Nou Camp lam an hawi.

Mahse, an bu zawlah chuan dan pangngaiin Barca an la hmuhnawm reng a, Nilaini zana Champions League khel tura leng lut tur Chelsea tan inkhel hmuhnawm a ni hauh lo ang. Messi-a'n a career goal 600-na a khung hnuah pawh Atletico aiin Barca an hlauhawm zawk.

Tlar hmaa Messi leh Luis Suarez nena inkawp Philippe Coutinho-a'n chance hlauhawm a nei fo a; Sergio Busquets, Messi leh Suarez ten goal dang khungna remchang an nei bawk.

Atletico erawhin Barca target-ah vawi khat chiah an pet thei a, hun tawp hnaih lama 4-2-4 formation an hman meuh pawhin awmzia a nei thei lo.

Barca thluak Valverde
Tun hnaiah Atletico Madrid khel a hmuhnawm ṭhin a, La Liga-ah Barca hneh thei tur team thlang dawn ila anni tluka thlan tur tun dinhmunah chuan an awm chuang lo - mah se Barca boss Valverde chuan he team hlauhawm hi a dang chat a, Nou Camp-ah Atletico tlarhma an hawihai.

Atletico lakah goal nawr nat a ngai tih hriain 4-4-2 formation a hman ṭhin chu a hnuchhawn a, tlarhmaah Coutinho, Messi leh Suarez a inkawp tir. Hliam vanga Andres Iniesta lakchhuah a nih hnuah midfield vei lamah Coutinho a sawn a, Liverpool forward hmun ruakah Andre Gomes luh tirin an talbuai lo.

Mikhual team-in hun tawp hnaih lamah Costa, Antoine Griezmann, Kevin Gameiro leh Angel Correa te tlarhmaah rem vek mah se Gerard Pique leh Samuel Umtiti an nghing duh lo a, midfield laia Busquets, Ivan Rakitic leh Iniesta/Coutinho inkawp hmuhnawm zia lah hrilh nawn kan ngai lo - match hnih chhung a zawna hattrick siam tawh Griezmann hmel hmuh tur a vang hle!

King Messi
Messi chanchin sawi a nih chuan a ropuizia sawi tel a ngai ṭhin a, khelmual chhunga a inlan apiangin he Argentine forward hian player danglam bik a nihzia a pholang ṭhin - a match hnuhnung pathumah freekick a chhuih lut vek a, a pet luh dan a in ang lo vek bawk.

Girona laka freekick a pet luh ṭumin defender zuang tur hisapin a 'kaw' awmchhunah vei lam sirah kil zetin a pet lut a, Las Palmas lakah a vei kil chungah kawh 'pawtin' a pet lut zui. Atletico lakah freekick hmang thoin a pet lut a, tun ṭumah erawh ding lam kil sirah a ni thung - freekick ropui leh pet dan in ang lo, mi pakhat 'ke' aṭanga chhuak vek si a ni.

Messi-a'n tun season La Liga-ah goal a khung hnem ber (24) a ni mek a, assist (12) a ngah ber a ni mek bawk. Kum 30 mi forward hian club 36 lakah goal khung tawhin La Liga player zingah hetiang tithei dang an awm lo. Barca boss Valverde chuan, "Messi ang hi khawvelah an awm lo," tiin a player a fak.

Atleti beiseina Europa?
Barcelona leh Real Madrid-in sum tam tak an sen karah Atletico Madrid hming lam rik tur a awm ve reng ṭhin a, Diego Simeone naute hian fak an phu - mah se 2014/15-a Spanish Super Cup an chawi hnua nomawi an chawi tawh lo erawh ngaihtuahna senna tham a ni a, Simeone-te ang 'level' tan heti chena rei nomawi chawi loh hi a dik thei lo.

Champions League group stage aṭangin petchhuah an nih tawh bawk si avangin Atletico-in tun dinhmuna an beisei theih ni a lang chu Europa League a ni a, nomawi chawi duh Argentine manager hian La Liga hnuchhawna Europa lamah a rilru a pe zawk a nih pawhin thil mak a ni lo ang - champion duh coach a ni.

Atletico tan La Liga nomawi beiseina a tawp tawh tihna erawh a ni lo a, league champion ni tur erawhin thil 'mak' in a puih tel a ngai tihna a ni zawk.

La Liga-ah head-to-head en a nih avangin point in angin Barca leh Atletico hi tawp pawh ni se Barca chu a champion tur zawk an ni. Heng zawng zawng ngaihtuah hian Atletico tan champion tur chuan an hmabak match-a chak vek a nih pawhin match 11 la awmah Barca vawi thum tal an tlawm a ngai bawk.

Barca hi tun season-ah an la tlawm lo tih ngaihtuah tel erawh chuan Atletico beiseina hi a chau rau hle - Madrid derby an la hmabak cheu bawk!