Wesley Sneijder-a'n Netherlands jersey a hlip

Netherlands tana foot­ball match khel hnem ber Wesley Sneijder chuan international football a chawlhsan thu a puang. Sneijder hian 2003 aṭang khan ram tan khel ṭanin match 133 a khel hman.

Kum 33 mi Sneijder chuan, "Kan ram tan kum 15 chhung ka inlan thei kha ka tan chawimawina a ni a, match 133 chhunga minute 9750 khelin vawi 85 hnehna kan chang a, goal 31 ka khung. Football aia ngaihhlut ka nei lo. Ṭhangthar rawn chhuak tharte duhsakna ka hlan. Engtik lai pawhin 100% pe rawh u," tiin a sawi.

Netherlands tan hian Manchester United goal keeper hlui Edwin van der Sar-a'n match 130 khelin inlan hnem ber record a chelh reng ṭhin a, nikum June thla khan Sneijder hian a rawn khum - ram tana a inlan hnuhnung ber chu nikum November thlaa Romania 3-0 a an hneh ṭum kha a ni ta.

Qatari club Al-Gharafa tana khel lai Sneijder hian thutlukna a siam hmain Netherlands manager Ronald Koeman nen inbiakna an neih hmasa a, Everton manager hian a game plan-ah a telh lo.

Netherlands hian kumin FIFA World Cup-ah an inpetling zo lo a, Koeman-a hnuaiah indinthar leh an tum a ni.

Dutch team enkawltu Koeman chuan, "Tun hnaiah chuan Wesley hi Dutch international ṭha berte zinga mi a ni a, player ṭha danglam bik leh rilru huaisen a ni. Mahse, team thar din ka duh a a ni," tiin thil awm dan a sawifiah.

Feet 5 leh inches 7 a sang Sneijder an ram club Ajax aṭanga bul ṭanin Real Madrid, Inter Milan leh Galatasaray tan pawh a khel tawh a, tunah hian Al-Gharafa tan a khel mek.

Kum 2010 FIFA World Cup final-a an ram hruai thlengtu Sneijder hi an ram tan inlan dawn tawh lo mah se, Dutch Foot­­ball Association (KNVB) chuan an thlauh thla nghal dawn lo, football a chawlhsan hnuah an ram team enkawl kawngah hna a thawh nghal theihna tur an ngaihtuah tur thu an sawi.