Champion Chelsea Chungah City
Premier League champion Chelsea chu Manchester City lakah si khat faiin an tlawm. Pep Guardiola naute hian Antonio Conte lak aṭangin league nomawi an chhuhsak ngei dawn niin a lang ta.
Guardiola naute hian match 29 khelh aṭanga point 78 hmuin, pahnihna Liverpool aiin point 18 zetin hma an hruai fal tawh. Chelsea eawh panganaah awmin Tottenham aiin point ngain an hniam zawk.
Pathianni zan Etihad Stadium-a inkhelah Man City tan Bernardo Silva chuan goal awm chhun a khung - Man City chakna hi goal khat chauh ni mah se minute 90 chhungin Chelsea lakah football thiam zawk an nih zia an lantir chiang hle.
Guardiola naute hian an mualah a zawnin league match 14 chhung hnehna an chang thei a, Blues lakah hian vawi 902 zet ball an inpe kual thei a, Premier League match khata ball in-pass hnem ber record an siam.
Italian manager Antonio Conte chuan, "League-ah team ṭha ber an ni tih an lantira a, season khata point 100 hlawh chhuak turin an ṭha tawk a ni," tiin a khingpui a fak. Premier League-a season khata point hmu tam ber chu Chelsea an ni a, 2004-05 season khan point 95 a hmu.
Chelsea khelh dan hi Sky Sports pundit pahnih Jamie Redknapp leh Gary Neville te chuan na takin an sawisel a; Conte chuan chhang lêtin, "Ka khelhtir dan mawlmang taka an sawisel hmain football khelh dan hmang an hriat hmasak a ṭul. Manchester City laka huaisen taka khelha a, 3-0 emaw 4-0 a chak loh hi ka duh lo. Media-te hi City laka goal thum chhuah vanga Arsenal sawiseltute kha an ni," tiin a khelh dan a sawifiah!