WENGER OUT - Arsenal Supporter : Arsenal enkawl turin ka la tha tawk - Wenger
Kum 1982 hnua a vawi khat nan Brighton & Hove Albion chuan Pathianni zan khan Arsenal 2-1 in an hneh a, Arsene Wenger-a ban duhtu pung thar mah se French manager hian ban a la tum lo.
Arsenal hian Europa League-ah Ostersund 3-0 a an hneh hnuah an mualah Swedish club hi 1-2 in an hneh lo a, last 16 an thlen tho avangin an hrethiam. League Cup final-a Manchester City 3-0 zeta an hneh loh avangin Wenger-a duh lotu an huangtau leh a, City bawk hi league-ah 3-0 bawkin an hneh lo a, an lungawi lohna belhchhahin a awm.
Mualphona
Falmer Stadium-ah Lewis Dunk chuan minute sarihna lekah a khung a, Arsenal keeper Petr Cech-a'n corner aṭanga ball kal a hnek chhuah fuh tawk loh vang a ni.
Minute 26-naah Laurent Koscielny pass sual chu Pascal Gross chuan vawrh lutin Gunners defender Calum Chambers leh Shkodran Mustafi ten ven loa an dah Glenn Murray chuan tauh lutin Cech-a'n a tihtur a ti tawk lo.
Arsenal beiseina siam turin Pierre-Emerick Aubameyang chuan minute 43-naah mawi zetin Granit Xhaka ball pek chu goal-ah a chantir. Second half-ah Gunners-in inkhel an thunun tawh a, amaherawhchu goal hmuh tur a awm tawh lo. Gabon striker Auba hian siphurh sut theihna hun ṭha a neih chu keeper Mathew Ryan zawnah a pet.
Yellow card hmu tawh Gunners defender Sead Kolasinac chuan second half-ah Ezequiel Schelotto chu a nghawk lui a, Brighton player hi thlak ngai hial mah se referee-in Kolasinac hi card a pe nawn lo a, player 11-a khel tluan London club an vannei.
Wenger Out
Arsenal hi a zawnin match li an chak ta lo a, October 2002-a Everton, Auxerre, Blackburn leh Borussia Dortmund te an hneh loh hnua a zawna an chak loh lehna hmasa ber a ni.
Hemi ṭum hian champion lai ni mah se Manchester United hnuaiah awmin pahnihna an ni a, FA Cup an chawi nawn thung. Kum 15 hnua thil awm dan erawh a dang tawh, Gunners hian 2003-04 season hnuah league nomawi an chawi tawh lo.
FA Cup-ah champion lai ni mah se an match hmasa berah Nottingham Forest hneh loin an tla nghal a, final an thlenna League Cup pawh elpuite an pha tawh lo hle tih lantirtu chauh a ni a. Brighton an hneh loh ṭum hian player pawimawh pahnih Mesut Ozil leh Jack Wilshere ten langsar takin an lungawi lohna an lantir a, Wenger-a'n a thunun zo tawh lo.
Tunah hian league-ah paruknaah awm mekin palinaa awm Tottenham Hotspur an phak lohna chu point 13 a ni a, Europa League-a champion chu Champions League khelh theihna kawng awmchhun a ni tawh. Hetah pawh hian Gennaro Gattuso hnuaia hartharhna chang mek leh anni aia Europe-a sulhnu nei ṭha zawk AC Milan an hmachhawn dawn.
League nomawi an chawi lohna a rei tawh a, nomawi aia club vantlang nih an hnaih zawk avangin Arsenal ṭantute au hla chu 'Wenger Out' tih a ni leh ta. An banner phochhuahah pawh 'Kum 2019 ni loin tunah chhuak rawh' tih te a ni a, a contract neih lai hmang zo turin an duh tawh lo.
A thleng dawn?
Arsenal neitu Stan Kroenke-a'n manager Wenger chungah rinna nasa tak nghat mah se mipui lamin an duh lohna an lantir nasat avang te, ṭhutna ṭhahnem tak luah khah loa a awm avang te leh an result a ṭhat miau loh avangin French manager hun hi a tawp hnai niin a lang.
Gunners keeper hlui David Seaman chuan, "Final-a an khelh dan kha a thinrimthlak a, Arsenal inkhel a ni tih awih a har hle. Arsene hian Europa League a champion a nih chuan season khat dang contract a hmang zo a nih pawhin thih theih a la ni a, an champion lo a nih chuan Arsene hi pa luhlul tak a nih avangin club thuneituten thutlukna an siam mai a ṭul a ni," tiin a pu hlui chu a hna ngai chelh reng tlak a nih tawh loh thu an sawi.
Chhuah la tum lo
Arsenal keeper Petr Cech chuan, "Khualmuala chak tur chuan ka goal hnih chhuahna ang a tihsual kha thiang lo. Kan team-in theihtawp chhuah mah ila thochhuah leh a har tawh a ni," tiin a thiam loh a nih thu a sawi. French defender Laurent Koscielny pawhin manager chauh ni loin an vaia thiam loh a nih thu a sawi bawk.
French manager Arsene Wenger chuan, "Mipuite lungawi lohna ka hriatthiam pui a, season laihawla League Cup final khelh a ngaih a, chak bawk si loh chuan harsatna belhchhahin a awm. Final kan khelh avanga City nena kan inkhelh hun sawn a nih te khan Brighton nena kan inkhelhnaah kan theihna zawng zawng kan pe thei lo a ni," tiin a sawi.
A hmalam hun chungchang sawiin Wenger chuan, "Club tana ṭha ber ka la ni em? Ka chhana chu 'aw' tih hi a ni. A chhan chu tun hmain hetiang dinhmun hi ka lo paltlang tawh a, manager ka nihna anga ka hna chu tuna kan buaina sut kian dan zawn hi a ni. Ka theih ngei ka ring a ni," tiin chhuah a la tum lo hle.