Neymar tel lohna PSG khelmualah Real
Paris Saint-Germain-in France-ah rorel mah se Europe-ah roreltu nih an duh a, an mang ram thlenpui thei tura an beisei Neymar chu Barcelona aṭangin pound maktaduai 200-in an lalut.
Mahse, PSG-in an mamawh hunah tak Neymar an chhawr thei dawn lo a, hliam vanga chawl mek Brazilian forward tel loin Real Madrid chu Champions League last 16 second leg-ah zanin dar 1:15 hian an mikhual dawn.
Team pahnih intawn hmasakah 3-1 in Real an chak tawh a, Unai Emery hoten quarterfinal khelh an duh chuan 2-0 tala hnehna an chan a ṭul dawn tihna a ni–hna awlsam a ni lo ang.
Neymar aiah Di Maria
Unai Emery-a'n Neymar chhawr thei dawn lo mah se Real Madrid player hlui Angel Di Maria chu an mamawh chhanna a nih theih a beisei thu a sawi. Spanish coach chuan, "Di Maria leh Neymar hi danglamna thlen thei player an ni," tiin Neymar awm loh hlanin Argentina international chuan danglamna a thlen theih a beisei thu a sawi.
Manchester United-a a hlawhchham hnua PSG lam pantu forward hian season duhawm tak a hmang mek a, French club tan tun season-ah match 34 khelin goal 17 a khung tling der tawh. Emery-a'n Neymar hmun ruak hnawh khat thei tura a beisei hi thil mak a ni lo.
Emery chuan, "Mahni inrintawkna, tawnhriat leh tumruhna a neihte nena ngaihtuahin Di Maria hi player ṭha tak a ni a a, Real hmachhawn hi ani leh a ṭhiante tan hun duhawm a ni," tiin a player chuan Real lakah a theihna a pholan a beisei.
Neymar tih loh chu
Ligue 1-a an match hnuhnung berah PSG-in 2-0 in Troyes an hneh a, Emery-a'n a player engemaw zat chawlh hahdamtirin Kylian Mbappe, Marco Verratti leh Edinson Cavani te chu inkhel bul ṭan zingah an hmel hmuh tur a awm lo.
Emery chuan, "Ka player zingah hliam tenau nei engemaw zat an awm a, mah se Real Madrid kan hmachhawn hunah chuan Neymar tih loh zawng chu an inkhelh theih ka beisei," a ti–inlan thei lo tura ngaih Kylian Mbappe pawh a inlan thei dawn tihna a ni.
Sevilla boss hlui chuan sawi zawmin, "Mbappe kha Troyes hmachhawn thei turin kan beisei hial a, mah se doctor-in chawlh hahdamtir turin min hrilh. Real lakah chuan a khelh theih ka beisei," a ti.
Real an dam
Real Madrid-in an league match hnuhnung bera 3-1 a Getafe an hneh ṭumin Toni Kroos leh Luka Modric chu hliam vangin an inlan thei lo a, Zinedine Zidane-a'n training an zawm a beisei thu a sawi hnuah midfielder pahnih hian training an zawm.
Mahse, Real-in PSG an hmachhawn hmain ni hnih chiah training-na hun an nei a, first leg-a hnehna an channa kawnga player pawimawh pahnih hi Zidane-a'n chawlh hahdamtir a thlang hmasa zet a nih pawhin a mak lo ang.
Zidane-a'n Getafe an hneh hnu lawkah, "Kroos leh Modric hi an khel thei lo a nih pawhin buaina tur a awm lo. Player dam ṭhain an khel dawn tihna a ni mai a, ruahmanna kan neih dan pawh sawilawk ṭul ka ti lo," tiin a lo sawi tawh a, Modric leh Kroos tel lohna starting XI a rem mai thei.
Paris-ah France legend
Kum 45 mi Zidane-a'n player a nih laiin France tan match 108 khelin goal 31 a khung sak a, World Cup 1998 leh Euro 2000-a an champion ṭumin an player pawimawh a nih avangin France ramah chuan ngaihsan rawn a ni.
Ngaihsan a nihna hmunah coach angin Zidane a kir dawn a, mi tam tak hlimna a lo thlen tawh ṭhinna hmunah an ram club ṭha tukdawl turin a feh chhuak dawn. Boruak a danglam dawn tih a chiang a, Zidane erawh a buai phah lo.
FIFA World Player of the Year ṭum thum ni thei coach chuan, "Coach ka nih hnua a vawi khat nan France-ah ka kal dawn a, mah se keimahah boruak danglam engmah a awm lo. Match dang ang thoin inbuatsaihna ka kalpui a, game hautak a nih dawn avangin hnehna chang tur chuan theihtawp kan chhuah a ngai dawn a ni," tiin a sawi.