Astori thihnain Italy a barakhaih

Fiorentina captain leh Italy international Davide Astori chu Pathianni khan lungphu chawlin a thi a, amah hi kum 31-a upa niin a nupui Francesca Fioretti leh a fanu kum hnih mi a kalsan a ni.

Astori thihna hian khawvel a deng chhuak nghal a, Pathiannia Serie A inkhel tur match sarih khelh hun an sawn a. Italian defender khelhna Viola (Fiorentina sawina) te, club hrang hrang te leh player hming langsar tak tak ten an ui thu an sawi nghal bawk.

Tu nge Astori?
Davide Astori hi 7 January 1987 khan Bergamo-ah a piang a, kum 2001-a AC Milan a zawm hmain khawtual club Pontisola tan a khel ṭhin. Milan-ah hian kum 2006-ah contract puitling ziak mah se khelhna hmun chang pha loin Serie C1 club pahnihah Pizzighettone leh Cremonese ah te intuaihriam turin loan-in a chhhuak.

Kum 2008-ah Cagliari zawmin hetah hian hming a chher a, Sardinia tan hian match 174 zet khelin kum 2011 khan a vawi khat nan Italy kawr hain Ukraine a hmachhawn.

Roma-in kum 2014 khan pound maktaduai 1.8 chawiin Astori hi season khat chhung atan an hawh a, pound maktaduai 4.5-a lakluh ngheh theihna dan a awm bawk. Rome club-in an lak ngheh hma chiahin Cagliari-ah bawk contract thar a ziak a, Fiorentina-ah loan hmanga kalin season khat a khelh hnuah contract nghet a ziak a, tun season ṭantirh khan captain atana ruat a ni.

Italian defender hian 2013 FIFA Confederations Cup-a Azzurri pathumna an nih theih nan Uruguay lamah goal a khung a, penalty shootout hmangin hnehna an chang. Hei hi ram tana vawi 14 a inlana a goal khung awm chhun a ni.

Mangṭha Astori
Serie A khelh hun tur an tihchian hmain AC Milan manager Gennaro Gattuso chuan Astori thihna vangin Milan derby kaltlang pui a harsat tur thu a sawi nghal a.

Astori agent Claudio Vigorito chuan, "Milan youth team tana a khelh lai aṭangin kan inhrawn tawh. Tunah Fiorentina captain a ni a, ram tan a khel tawh a, club ṭha tak tak tan a khel tawh a, hei aia sang hi player tan thlen theih a ni chuang lo. Amah hi chhungkaw zahawm tak aṭanga sei lian a ni a, a hawihawm em em a, pa ṭha tak a ni. A chunga hetiang a thleng hi ka hrethiam thei lo a, ka na vek a ni," tiin a ui thu a sawi.

Italy captain Gigi Buffon chuan, "Mi chungchang sawi hi ka tih dan a ni lo a, amaherawhchu i (Astori) chungchangah chuan ka dan insiamchawp hi ka bawhchhiat a ṭul a ni. A chhan chu nupui naupang tak i nei a, chhungkua i din a. I fanu chhia leh ṭha pawh la hre lo hian a pa hi mi fel tak a ni tih hi a hriat a ṭul a ni. Tunlai huna mi tam takin an kalsan tawh nun dan mawi hi nang chuan i la nei a ni. Mi dang hmakhaw ngai chungin i khaw sa a, i hawihhawm a, midang zahna i lantir bawk. Infiammi ka hmuh tawhah chuan entawntlak ber i ni. Hahdam takin chawl ang che," tiin a ṭhianpa a thlah ve bawk.

England FA chuan thuchhuah siamin March 27-a Italy nen Wembley Stadium-a an inhmachhawn hunah Astori sunna an hman tur thu an tichiang.

Astori thih dan
Pathianni zana Udinese hmachhawn turin Davide Astori hian Fiorentina-a khelhpuite rualin Udine-ah an zin a, La di Moret hotel-ah an thleng. Italy huna chawhma dar 9:30 chu Viola player-te tan tukṭhuan ei hun a ni. Ṭum danga thleng hmasa ber ṭhin captain Astori a awm tak loah chuan a room an han bia a, chhang tur a awm lo. Italian defender hi a khumah thiin hmuh a ni a, club thuchhuak aṭanga a lan dan chuan massage therapist chu ruang hmu hmasa bertu a ni.

Astori ruang hi endik turin Santa Maria della Misericordia Hospital-ah hruai a ni a, Fiorentina player-te chu thlawhtheihnain Pathianni hian Florence-ah hruai hawn an ni. Napoli chief medic Alfonso De Nicola chuan, "Italy hi thihna thleng thut thei inven dan tur hi ram dang ai mahin kan zir nasa a. Professional chinah chuan 'lungphu chawl' vanga thihna pumpelh turin dan angin player-ten kum khat chhungin test hrang hrang an patlang a ngai a, chung zingah chuan ECG leh stress test te pawh a tel a ni. Amaherawhchu dan theih loh chin a awm a, inzir belh zel kan mamawh a ni," tiin a sawi. Astori hma hian April 2012 khan Livorno player Piermario Morosini chu Serie B inkhelah tlu sawpin a thi tawh bawk.