Copa America an sawn hla

South America lamah pawh coronavirus hri lengin nghawng a nei zel a, kumina khelh tura tih Copa America chu kum khata sawn hlat a ni.

Colombia leh Argen­tina-in an inthlen ṭawm tur Copa America sawn a nih thu hi nimin tlai (India sana) khan South American Football Confederation (CONMEBOL) chuan an rel fel tawh niin media hrang hrangah an thehdarh a, he chanchin ziah lai hian CONMEBOL lam hian official-in an la puang lo thung.

Kumin June 12 leh July 12 chhunga khelh tura tih he inelna hi Argentine star Lionel Messi tana Copa America hnuhnung ber tura ngaih a ni a, kum khata sawn hlat a nih hian Messi hi a upa leh sawt dawn, tihte media lamin an tuipui nghal hle.

Copa America-a player ṭhahnem tak hi European club-a khel an ni a, European Championship chu kum 2021-a khel tura an sawn chiah khan European club-a khel player-te hi Copa America lama khel turin club leh ramin an inchuh dawn tih a chiang a, media lam rin lawk ang ngeiin Copa America pawh sawn hlat a ni dawn ta a ni.