Spurs mualah Juve lut ve thung dawn
Juventus Stadium-ah minute kua lek an inkhel hman tihin Tottenham lamin si hnih an phur hman a, an tan Champions League zin kawng a tawpa ngaih a ni. Mahse, Spurs hian Harry Kane leh Christian Eriksen an nei miau a, an si phurh an sut zo thei.
Thia ngaih tawh Mauricio Pochettino naute an tho leh a, zanin dar 1:15 hian Wembley Stadium-ah an intawng nawn dawn; inhnehtawk a awm thei tawh dawn lo, quarterfinal lut tur chinfel a ni dawn. Spurs tan tlang turin goal chhuah loh a tawk laiin, Old Lady tan erawh khung ngei a ngai thung - inkhel a hmuhnawm ang.
Tottenham hian kumin bikah inelna hrang hrangah hneh loh an la tawng lo, Poch-a enkawl team hi Juve tana zuam sual theih tur an ni. Chutihrualin Massimiliano Allegri naute hi khualmuala buai tur an ni lo, tun hnai season thum chhunga UCL final vawi hnih lut thei an ni.
Wembley huhang
White Hart Lane siamṭhat mek a nih avangin Tottenhman-in home match khelh nan Wembley an hmang, England national stadium hi a tirah hmangthiam nghal lo mah se tunah chuan mikhual tan hmun ralṭi a ni tawh.
Mauricio Pochettino naute hian tun season inelna hrang hrangah an khelmualah hian vawi hnih chiah chak loh an la nei a, mikhual rothap tak tak tura ngaih Real Madrid, Manchester United, Liverpool leh Borussia Dortmund te pawh an tukzal thei; Italian champion pawh an duh ang ngawt chuan an khawsa bikin a rinawm loh.
Hlauh tur chu Kane
Match 37 a khelh aṭanga goal 35 khung thei Harry Kane hi tun season bikah chuan striker hriam leh hmuhnawm ber tia chhal ngam a ni a, European club lian dangten an team tana khel tura an duh leh, defender ten an hmachhawn chak loh a ni.
England international Kane hian Turin-a an inkhelh ṭumin goal a khung a, tun ṭumah pawh tlarhmaah a mal tlat leh ang. Kane thlawp turin ball thiam leh fing Eriksen a nei, ani bakah hian a chet fuh nia dan hleih theih loh Dele Alli a la awm bawk.
Sawi hmaih theih loh chu Heung-min Son a ni. South Korea international forward hian kar tawpa Huddersfield an hnehna goal hnih a khung a, Asian tlangval hi Italian defender palian leh rorum rual tana namnul theih tur chi a ni bik lo.
Spurs tlarhma lam an hriam a, an buai theihna tur nia lang zawk chu tlarhnung a ni. Central defender Toby Alderweireld hliam a la dam lo a, right back Serge Aurie chu hrem vangin a lut thei lo bawk ang - Kieran Trippier-a'n inkhel bul a ṭan tura ngaih a ni.
Tlang a ngai
A zawna season ruk chhung Serie A champion ni thei Juventus hi team ṭha leh ropui chu an ni ngei mai. Chutihrualin Champions League final an khelh hnuhnung pahniha an chak zawh loh avangin an ropuina a famkim bik lo. European club lian dang chunga leng nih an duh chuan champion a ngai.
First leg-ah Massimiliano Allegri nau ten an goal hnih neih sa an venhim theih loh avangin an hna a hautak zual tawh dawn. Amaherawhchu, European football bikah Bianconeri hian tun hmain an khelmuala an inhnehtawkpui hnuah Hungarian club Ujpest FC, Swedish club Djurgardens, Dortmund, Dynamo Kiev, Barcelona leh Fiorentina te chu khualmualah an hneh let thei - Spurs lakah beiseina an nei thei.
Higuain a dam
Juventus striker Gonzalo Higuain-a'n tun hnaiah hliam vangin an match hnuhnung pahnih a khel lo, tun season-a goal 20 khung tawh Argentina international hi Spurs hmachhawn thei turin an dam tawh. Old Lady hian hliam vangin Federico Bernadeschi, Juan Cuadrado leh Mattia De Sciglio te an la chhawr thei dawn lo thung.
Higuain bakah Paulo Dybala an la nei, season tir lama che ṭha tak Dybala hian kar tawp khan Italian team ṭha Lazio lakah goal khungin a team hi hnehna a chanpui thei leh tawh; ni dang ang bawkin midfielder Blaise Matudi chu an thahrui pawimawh a ni leh bawk ang.
Italian manager kaihhruaina hnuaia goal ven thiam Juve hi an tlarhnung a phui ṭha tawk, a bik takin khualmuala Champions League knock out stage china an match hnuhnung patumah goal an chhuah lo - mahni inveng tak chungin team khawng tak Tottenham sut hawn an tum dawn a ni.