Lajong-in East Bengal an chelh Champion tura dinhmun tha ber Minerva

East Bengal-in I League nomawi chawi theihna hun ṭha an neih chu Thawhṭan zana Shillong Lajong nen 2-2 a an inhnehtawk avangin a su kuk a, Minerva Punjab chu champion tura dinhmun ṭha ber an ni leh ta.

I League hi naktuk hian khelh zawh a ni dawn a, match thum khelh hmabak la awm chu tlai dar 3:00 vekah khelh a ni ang. Club pali Minerva Punjab, Mohun Bagan, Neroca leh East Bengal te chu champion thei vek an ni a, league khelh tawp ni hian an inlan vek bawk ang.

Kolkata club daltu Mizo
East Bengal boss Khalid Jamil-a'n JL Nehru Stadium, Shillong-ah Chennai City 7-1 a an sawp ṭuma starting eleven chang Brandon Vanlalremdika leh Lalramchullova ten inkhel bul a ṭan nawn tir a, defender pawimawh Eduardo Ferreira erawh hrem vangin an chhawr thei lo.

Armed Veng tlangval Chullova vawrhluh chu Dudu-a'n minute 20-naah a tauh lut a, goal khat vangin Lajong an buai phah lo. Second half minute linaah defender Aibanbha Dohling hmangin Lajong-in an siphurh an sut a, Mizo tlangval Samuel Lalmuanpuia chuan minute 69-naah ama penalty hlawhchhuah chu goal-ah chantirin 2-1 in hma an hruai.

Hun tawpah Red and Gold an vannei a, Nigerian defender Dudu hmangin an siphurh an sut hram. Amaherawhchu East Bengal-in point thum an hlawhchhuah loh avangin champion turin midang result-ah an innghah a ṭul tawh thung.

Beisei nei Khalid
East Bengal coach Khalid Jamil chuan, "Point kan hlawh chhuak kha kan vannei a, champion turin beiseina erawh kan la nei tho. Awlsam takin kan chak theih kan inbeisei a, kan beisei loh ang deuhin Lajong kha an khel ṭha a ni," tiin champion beiseina an la neih thu a sawi.

Khalid-a chuan sawi chhunzawmin, "Player-ten an tihsual en let se, kan match hnuhnung ber hi kan chance hnuhnung ber a nih avangin theihtawp kan chhuah a ngai a ni," a ti.

Super Cup-ah Lajong?
Super Cup-ah team paruk an tling nghal dawn a, paruknaa awm Shillong Lajong hi Gokulam Kerala ban phakah an awm. Kerala club hian an match hnuhnung bera Mohun Bagan an hneh chuan Super Cup an khel ang a, Lajong hian playoff an khelh a ṭul thung ang.

Zemabawk North tlangval Samuel Lalmuanpuia chuan, "Kan tih tur kan ti tawh a, kan season tawp danah kan lungawi. League match hnuhnung bera tlawm hi kan duh ngai lo a, chuvangin East Bengal nen pawh khan kan theihna zawng zawng zawng kan chhuah a ni," tiin Vanglaini a hrilh.

Samuel-a hian tun season-ah goal thum a khung a, vawi hnih chu penalty aṭanga a khung niin vawi khat dang leh chu freekick aṭanga a khung a ni.