French Open atan Serena a inpeih ang - Serena coach

World number 1 hlui Serena Williams chu fa a neih hnuah tennis court-ah a rawn kir leh thei tawh a, tun kar chhunga khelh tur BNP Paribas Open-ah a inlan dawn.

American star Serena hian nikum khan fa tir pai chungin Australian Open nomawi a chawi a, Grand Slam title 23-na a lak hnuah inkhelh a chawlhsan zui bawk. Season bul ṭanna Mel-bourne-ah khan inlan tum mah se duhthusamin a inpeih hman loh avangin a inhnukdawk.

Serena Williams-i coach Patrick Mouratoglou chuan, "Tunah chuan kum 36 mi a ni tawh a, fa a neih bakah kum khat chuang inelna hmachhawn loin a awm bawk, a nihna takah chuan tennis a khelh hun chhunga chona lian leh hautak ber a hmachhawn dawn a ni," tiin Serena chungchang a sawi.

Beiseina an la neih thu sawi zuiin Mouratoglou chuan, "A taksa a fit ṭha a nih pawhin midang nena inkhel tur chuan insiamrem a mamawh dawn a, zawi muanga tournament khel zelin Roland Garros-ah chuan a ṭhat dan takin a khelh leh theih tawh kan beisei," a ti a, Grand Slam nomawi chawi leh ngei an tum thu a sawi bawk.