NBA legend Kobe Bryant tan Oscar - 'Dear Basketball'

Thawhṭanni khan khawvela film chawi-mawina sang ber Oscar Awards semchhuahna neih a ni a, NBA legend Kobe Bryant chuan Los Angeles khawpuia chawimawina semchhuah hunah hian best short animated film chawimawina a dawng.

NBA Championship nomawi vawi ruk lo chawi tawh basketballer hian 'Dear Basketball' tih hmanga minute nga chhung film tawi a siam avangin he chawimawina hi dawng. Dear Basketball hi Kobe Bryant-a'n basketball a mangṭhana thu a ni a, hemi behchhan hian film tawi an siam a ni.

Dear Basketball?
Infiammi nichungin Bryant-a'n Oscar chawimawina a dawng a, a ropui dan a danglam hle. He chawimawina a dawn theihna chhan Dear Basketball hi kum 2015-a basketball a mangṭha nana a ziah kha a ni a, November 29, 2015 khan The Players Tribune website-ah tarlan a ni.

Bryant-a'n Basketball a chawlhsan tur thu a puan rualin Dear Basketball tih hi a ziak a, he thuziak hi Basketball ngainatu tam takin an lunglenpui. Bryant hian American animator lar Glen Keane nen ṭangkawpin short animated film-ah an chantir chhunzawm a, Oscar hial an dawng ta.

Bryant thukhawchang
Kum 2016-ah Bryant-a'n khelmual chhunga inlan a bansan tawh a, 2018-a Oscar chawimawina a dawn ṭumin infiammite tan a la ding reng tih erawh a pholang. American basketballer ropui chuan, "Basketball player-te chu ngawi renga ball beng sawt tura beisei an ni. Mahse, chumi piahlam thil ka ti thei chu ka lawm a, Academy hnenah he chawimawina ropui ka dawn avang hian lawmthu ka sawi a ni," a ti.

Tun hnaiah Golden State Warriors player Kevin Durant leh Cleveland Cavaliers tana khel LeBron James-te chuan US president Donald Trump an duh lohna thu ualau takin an sawi a, hei hi Fox News presenter Laura Ingraham chuan sawiselin, "An ngaihdan chu anmahniin pai mai se, a nih loh chuan nakinah ngawi renga ball beng sawt mai tura hrilh an la ni mai ang," tiin a lo khak tawh a, Bryant hian a ṭhiante chhan nan ṭawngkam a rawn nei ve leh a ni.

Tu nge Kobe?
Kobe Bryant hi NBA chanchina player langsar ber pawl a ni a, Los Angeles Lakers tana shooting guard, jersey number 8 leh 24 ha ṭhin a ni. LA Lakers chuan an player ropuiin kum 20 chhunga a lo hak tawh jersey hi amah chawimawi nan player dang hak ve theih loh turin an chawlhtir tawh.

Black Mamba tia hminglem an pek Kobe hian Lakers-a a khelh chhungin NBA championship vawi nga a champion pui a, All-Star team-ah vawi 18 a tel tawh a, All-NBA Team member-ah vawi 11 telin All-Defensive team member-ah vawi kua a tel thei.

Lakers tan 33,643 points score sakin he team tana point score hnem ber a ni a, NBA pumpuiah pathumna a ni bawk.NBA-a a ropui tluk zetin ram tan pawh a ropui a, FIBA Americas Championship, 2008 Beijing Olympic leh 2012 London Olympic-ah te khan USA a champion pui.