Man Utd-in training an titawp

Manchester United chuan coronavirus vangin player-te chu training lo turin an hriattir. English club hian kar liam ta Ningani khan Europa League last 16-ah LASK chu khualmualah 6-0 in an hneh a, hemi hnu hian Carrington-ah mipui hmuh theih loin training an nei a ni.

Coronavirus vanga buaina a len chhoh zel avangin Manchester United chuan player-te chu Carrington tlawh lo turin an hriattir a, chutihrualin an training hmun hi uluk taka endik a ni reng thung. United hian April 4 hian Premier League-ah Brighton an hmachhawn dawn a, tun dinhmuna a lan dan chuan ruahman lawk dan hian kalpui theih a rinawm loh.

United hian training an kalpui lai pawh hian medical team chuan player-te hi ni khatah vawi hnih an endik a, Ole Gunnar Solskjaer hote hi training ground an thlen leh an zawhah club doctor-ten an endik. Tunah erawh Premier League club dang hnung zuiin an club training an khar tawp.

Inhliam vanga hun rei tak khel thei lo Paul Pogba pawhin a piancham (March 15) denchhenin UNICEF nen ṭangkawpin coronavirus vanga naupang tuarte puih nan Facebook page kal tlangin ṭanpuina a dil a, an sum hmuh chhuahin £27,000 a tlin chuan a leta tih pun a intiam. Pogba leh UNICEF hian an beisei ang zat sum an hmu thei a nih chuan health worker hman turin kutkawr 333,332, hmai tuamna 2,777 leh vented goggles (tarmit chi khat) 9,615 lei theih an inbeisei a ni.