United-in Liverpool an vau lâwk

Manchester United chuan March 10, Inrinni zanah an hmelma Liverpool an mikhual dawn a, Jose Mourinho hoten Reds vau lawk nan Thawhṭan zan khan Crystal Palace chu goal hniha an hnufual hnuah 3-2 in an lehthal. United hian Jurgen Klopp-a hote luah lanin Premier League-ah pahnihna dinhmun an luah a, an inthlauhna erawh point hnih chauh a ni.

Selhurst Park-ah Palace-in Andros Townsend hmangin minute 11-naah hma an hruai a, Patrick van Aanholt-a'n minute 48-naah goal hnihna a khung leh bawk. United-in huaisen takin an bei let a, Chris Smalling hmangin minute 55-naah an siphurh an sut ṭhen a, Romelu Lukaku hmangin minute 76-naah an siphurh an sut zo. Tun hmaa 'Fergie Time' an tih hunah Nemanja Matic chuan United chakna goal a khung.

Vanduai Palace
Palace-in inhliam vangin first team player 10 zet an chhawr thei lo a, chung zingah chuan Wilfried Zaha, Yohan Cabaye leh Mamadou Sakho te pawh an tel. Hetichung hian Roy Hodgson hote hian Tottenham Hotspurs chu minute 87 chhung an chelh thei a, Harry Kane goal vangin point an hmu lo.

United nen hian goal hnihin hma an hruai a, injury time minute khatnaa Matic goal ropui vangin an phu angin point an hlawh chhuak lo. Palace hian goal hniha hma an hruai hian 18-na aṭangin 13-naah an invawrh chho hman a, amaherawhchu hun tawp meuh chuan 18-naah bawk an let leh a ni.

Palace boss Hodgson chuan, "Kan vanduai a kaltluang a, point hmu lo bawkin kan khel zo a, Tottenham nena kan inkhelh ṭum ang tho khan eng emaw chu kan phu a sin. Jose pawhin ka thusawi hi min ṭawmpui ang," tiin an phu ang result an hmuh loh thu a sawi.

United lam...
First half-ah United chu team naran an ni a, second half-ah harhtharna an chang chauh. Portuguese coach Mourinho chuan, "Halftime-a ka ṭawngkam hman zawng zawng sawi a rem lo a, TV a pek chhuah tur a nih chuan paih ṭhen tur a tam dawn. Amaherawhchu kan khelh dan hmang kan thlak tih erawh sawi lan theih a ni," tiin a naute a fuih nasat thu a sawi.

Mourinho hian second half ṭantirhah Marcus Rashford luhtir nghalin Luke Shaw leh Juan Mata te 2-1 a an hnufual laiin a luhtir lehnghal a, awmze neia subsitution a siam hi inkhel danglamna a ni tel bawk.

United boss chuan, "Marcus khan a luh aṭang khan Palace tlarhnung a tibuai nghal. Goal kan mamawh avangin risk lain Lingard chu right back-ah dah a ṭul a, goal nawr min puih theihna a nih rualin goal kan chhuah theihna a ni bawk. Hei hian Palace tan harsatna a siam a, amaherawhchu Hodgson pawhin hmun hmaih loin Alexander Sorloth a rawn luhtir phah reng a ni," tiin khelmual pawn lam aṭanga manager-te thutlukna siam dan a sawi lang.

A tawpah player nei ṭha zawk Mourinho a chungnung a, an chak theihna chhanah 2-2 a nih laia David de Gea-a'n Palace striker Benteke goal khung tur a dang chu sawi hmaih theih a ni lo. Matic-a'n injury time-a box pawn aṭanga a volley luh chu game plan a ni tawh lo a, mimal thiamna hmanga chakah ngaih theih a ni.

Kum 55 mi Mourinho chuan, "Goal hniha hnufual hnu chuan point khat chauh pawh kha lungawithlak tawh. Pahnihna nih kan duh a, chutihrualin palina nih pawh a harsa dawn. Hnehna kan chan takah chuan kan dinhmun a ziaawm hret," tiin an point hmuha a lungawi thu a sawi.

United hmabak chu an hnuai chiaha awm Liverpool an ni a, Reds hian nizan khan Champions League last 16-ah FC Porto an mikhual avangin Jurgen Klopp-a hoten hahdamna hun an nei tlem zawk.