Arsenal inlanna tur EFL Cup - Second Round!

Zanin dar 12:30 hian Arsenal chuan EFL Cup - Second Round khel turin West Brom an tlawh dawn. Championship lama pahnihna dinhmun luahtu Baggies hi team talbuai lai Mikel Arteta naute tan chetsual theihna tur an ni a, insiamṭhatna hun ṭha a ni thei bawk.

Premier League aṭanga European football khel phak chin chuan league cup hi third round aṭangin an khel dawn - Arsenal erawh Europe-ah an inlan phak loh avangin second round aṭangin an khelh a ngai a ni.

Boruak inang lo
Arsenal hian Premier League match hnih an khelh tawhah chak an la nei lo, an chak lo a ni satliah lo - goal li chhuahin an khung ve miah lo bawk, season bul an ṭan chhe takzet a, an tan chuan League Cup hi insiamrem theihna remchang a ni ang.

West Brom erawh EPL aṭanga tla hlim ni mah se inelna hniam zawkah bul an ṭan fuh. Championship match li an khelh tawh chinah vawi thum an chak a, point 10 hmuin hmahruaitu Fulham nen an point neih zat a inang mek.

Season bul ṭan fuh lo leh ṭan fuh an inkhel dawn - knockout football a nih miau avangin pakhat zawk chu an tla dawn. Team boruak thlir chuan league sang zawka awm Gunners hi dah san zawk ngawt theih pawh an ni bik lo.

Chak a ngai
Chelsea an ngam loh hnuah Mikel Arteta-a'n inrintawkna nei turin chak an mamawh thu a sawi. Spanish manager chuan, "EFL-ah chuan chak lo team an tla nghal, round sang zawk thleng tur chuan kan chak ngei ngei a ngai dawn.

"Bul kan ṭan ṭhat loh avangin kan rilru a na, chhungrilah erawh kan inpawh tlang em em thung. Boruak ṭha leh nuam tak tawng leh turin chak kan mamawh a, chutiang chu thlentir kan tum ang," tiin a sawi a, an tihsual siamṭhat nan hman a tum.

Arsenal hian kar tawpah Premier League champion Manchester City an lenchilh zui dawn, league match khelh hmabak ngaihtuah chungin EFL Cup an khelh a ngai dawn tihna a ni a, an hmabak a hautak dawn takzet.

Hliam leh damlo
Captain Pierre-Emerick Aubame-yang-a'n hri leng a kai avangin match hmasa ber a khel lo, Chelsea an hneh ṭum erawhin bench aṭangin a lut thei tawh. Auba ang bawka hri kai Alexandre Lacazette, Ben White leh Willian te dinhmun a la chiang lo.

Gabon international Auba hian inkhelh tam a mamawh a, chutih rualin kar khata match hnih khel turin a fit tawk ang em tih erawh zawhna lian tak a ni. Minute 90 a khel lo a nih pawhin Man City hmachhawn tura inbuatsaih nan inlan se a tan a ṭhat a rinawm.

Covid-19 kai bakah season thar inbuatsaihna neih laia hliam Thomas Partey dinhmun a la chiang lo, kerek hliam vangin striker Eddie Nketiah pawh a la inkhel thei lo - hliam leh damlo an ngah avangin Arteta-a'n West Brom lakah a neih ṭhat hahchawlhtir ngawt a thei kher lo ang.

Tunge khel ang?
Goalkeeper Bernd Leno-a'n elpui tur a nei tawh, pound maktaduai 24 senga an lakluh Aaron Ramsdale hi Leno thlak tur ni lo mah se a elpui ṭha tak tur a ni dawn - rinrawl a nih nghal dawn loh avangin League Cup hi English player tan bul ṭanna remchang a nih a rinawm.

Midfielder Partey a awm loh avangin bench-a ṭhu tur Albert Sambi Lokonga-a'n bul a ṭan nghal a ngai a, zaninah pawh a inlan a ngai ang. Granit Xhaka an hahchawlhtir a nih chuan Real Madrid aṭanga an lakluh Martin Odegaard-a'n season bul a ṭan ve a rinawm bawk.

Tlarhnunga khel tur hi an la chiang lo hle. Pound maktaduai 50 man White leh Gabriel ten hri an kai a, Chelsea laka khel ṭha lo Pablo Mari leh Rob Holding te an inkawp leh a ngai ang; Blues laka hliam tuar Kieran Tierney erawh a chawl rih tura ngaih a ni.

EFL Cup - Secound Round
Zanin Inkhel Tur
Newcastle United 12:15 AM Burnley
Newport County 12:15 AM Southamton
West Brom 12:30 AM Arsenal