Remsiami a lo haw dawn

Tokyo 2020 neih zawh taka India aiawhtu Lalremsiami Hmar chu vawiin hian Mizoramah a lo haw dawn, harsatna hran a awm a nih loh chuan chawhnu dar 1:00 hian Lengpui a lo thleng tura beisei a ni.

Lengpuiah hian Mizoram sorkar ruahman angin lo hmuah a ni dawn a, thuthar thehdarhtute kawmna hun hman a nih hnuah Aizawl panpui a ni ang. August 26, Ningani hian Vanapa Hall-ah lawmpuina hun hman zui leh a ni bawk ang.

Kolasib nula, Thenzawl Hockey Training Center aṭanga inzir chhuak Remsiami hian junior team aṭangin India ai a awh chho tawh a, a kum rualpui dangte aia theihna a neih san avangin kum naupangte ni chungin senior team tan a inlan zui leh bawk.

Youth Olympic-ah vice captain ni chungin India hi silver medal a lak pui tawh. Tokyo 2020-ah khan India senior team tan match zawng zawng a khel kim a, medal hlawh chhuak chiah lo mah se palina an ni - an thlen chin hi India hmeichhiate thlen san ber ṭum a ni tho.

Lawmpuina
Hockey Mizoram chuan Olympian an nei thei chu an lawm thu an sawi a, Mizo nula Lalremsiami an lawmpuina thu pawh an lo chhuah tawh. Sorkarin lawmpuina hun a buatsaih turah Hockey Mizoram lamin chanvo nei lo mah se; August 27, Ningani hian Aijal Club-ah lawmpuina hun an hmang ang.

Hockey Mizoram hun hman tur hi United Sports Assocaiton of Mizoram nena inkawp a ni dawn a, mipui nawlpuiina an chim luih luih theih ni dawn lo mah se coach leh player hluite sawm bikte nen hun an hmang dawn a ni.

Remsiami hi Mizoram bakah India huapa mi hriat hlawh a nih vangin media lamin an bawh buai hle. Hockey Mizoram chuan an player hi dim deuh turin an duh a, a bik takin social media lam aṭanga online hmanga biak tumtute chu insum rih turin an ngen a ni.