Hammers tan Antonio a ropui; Foxes an sawp!

West Ham chuan season hmasa an chet ṭhat kha tihpalh a ni lo tih khelmualah an lantir a, Thawhṭanni zan khan Premier League-ah club ṭha Leicester City chu 4-1 in an sawp!

Hammers-in league match hnih an khelh tawhah hnehna chang ve vein table chung ber an luah zui a, Brendan Rodgers-a team Foxes tan erawh inenfiahna tur darthlalang ṭha tak a ni.

West Ham tan Michail Antonio chuan goal hnih a khung a, Hammers tan Premier League-a goal khung hnem ber record a siam zui - goal 49 a khung a, Hammers tana Premier League-a goal 47 khungtu Paolo di Canio record a khum.

Hammers tan Pablo Fornals leh Said Benrahma ten goal khat ve ve an khung bawk a, Foxes tana Youri Tielemans goal khungin awmzia a nei lo.

Foxes an nghing
Season hmasa Premier League-ah khualmuala Leicester aia point hlawhchhuak hnem chu Manchester City leh Manchester United chiah an ni a, Hammers khelmuala inkhel tur ni mah se team ṭha zawk Leicester-in rin an hlawh zawk.

Chutihrual chuan coach Rodgers-a'n inkhelh hmain an tlarhnung an ngheh tawk loh thu a sawi a, Liverpool boss hlui thusawi hi a tam zawkin an ṭawmpui ang - Jannik Vestergaard, Wesley Fofana, James Justin, Ryan Bertrand, Jonny Evans leh Nampalys Mendy te chu hliam vangin tlarhnungah an inlan thei lo vek!

Foxes tlarhnungah Ricardo Pereira, Daniel Amartey, Caglar Soyuncu leh Luke Thomas te an intlar a, Soyuncu tih loh hi chu 'regular' player ni phak lo an ni a, season hmasaa an league match khelh zat belhkhawm pawh match 41 chauh a ni a, a ropui lo hle.

He tlarhnung nghet lo tak ni minute 26-na lekah West Ham-in an su hawng nghal a, Pablo Fornals chuan Hammers tana a league match hnuhnung pathuma a goal thumna ni turin goal hmahruai a khung - Saïd Benrahma siamsak a ni.

A pawi zo ta
Foxes tlarhnung an nghet lo a, goal an chhuah hmasa bawk - a harsa tawh dawn tih a chiang. Thil harsa tawh sa tiharsa zual turin Ayoze Perez a che a, kum 28 mi attacking midfielder hi goal khungtu Fornals a rap lui nia a lan avangin minute 40-naah hnawhchhuah a ni.

Referee Michael Oliver chuan a tirah foul a ham lo zet a, mahse, video assistant referee a rawn hnuah foul pekna tur zawkah ngaiin a pe zui a, red card a pe tel - Spanish forward Perez-a'n English football-a match 274 a khelh tawha red card a hmuh hmasak ber a tawng.

Foxes-in goal an chhuah hnuah red card an hmu a, buainain kianzai a rel lo. Tlarhnung lama tawnhriat nei ṭha ber Soyuncu a chesual zui a, Turkish defender back pass chhe zet nang fuhtu Antonio chuan mahni hmasial lo takin Benrahma tan a siamsak.

Kum 26 mi forward hian league match hnih a khelha a goal hnihna ni turin goal-ah a lo chantir - minute 56-na a ni a, chak tur a chiangah ngaih a ni. Mahse, Foxes an beidawng lo. Hammers defender buai nuai karah Youri Tielemans chuan si phurh a sut ṭhen a, beiseina a awm.

Hriatreng tur Antonio
Hun tawp a hnai a, West Ham-in goal dang an khung lawk loh avangin an dinhmun a him bik lo. Mahse, minute 80-naah Antonio a inlar a, chance duhawm a hlah nual hnuah a hun a her chhuak - Declan Rice cross aṭanga ball kal chu Soyuncu ven karah a pet goal a, minute 80-na a ni.

Antonio-a'n lehkha khawnga ama lem an siam hmangin a record siam a lawm a, "A theih chuan naute angin min pawm kang se, ka record siam kha lawm ka duh - mahse, kg 94 ka ni a, ka lem an siam kha keimahin ka pawm ta zawk mai a ni," a ti!

Kum 31 mi forward hian a duhtawk lo. Minute 81-naah Ricardo leh Amartey ten an kar cheh chungin ball a pet kang a, rang zeta inher chungin goal-ah a chantir - tun season league match hnih aṭangin goal thum a khung tling der a, assist vawi hnih a nei. Hammers tan league match 161-ah goal 49 khungin assist vawi 27 zet a nei ta.