Vawiin aṭangin third Test an khel ṭan dawn

England leh India te chuan vawiin tlai dar 3:30 aṭangin Headingley Carnegie-ah third Test an khel ṭan dawn. First Test-ah ruahsur vangin chak zawk an awm lo a, second Test-ah Virat Kohli hoten 151 runs-a hnehna changin series-ah 1-0 in hma an hruai mek.

Test match hi vawi nga khelh tur a ni a, fourth Test hi September 2-6 chhunga khelh tur niin fifth Test hi September 10-14 chhungin an khel leh ang.

Wood a inhliam
England-in an bowler ṭha Mark Wood chu dar hliam vangin a chhawr thei dawn lo. Kum 31 mi Wood hi second Test ni linaah fielding-na lamah a inhliam a, Three Lions hian pacer pahnih Saqib Mahmood leh Craig Overton te back up atana an neih sa avangin a thlakna tur an ko lo.

Wood hi uluk taka en chhunzawm a ni ang a, third Test zawhah hian a dinhmun tur endik leh a ni ang. England hian hliam vangin Stuart Broad, Jofra Archer, Olly Stone leh Chris Woakes te an chan tawh bawk.

England captain Joe Root chuan, "Awm thei se chu ka ti khawp mai. Bowler pathumte hian 90mph aia chakin ball an vawm thei a, England cricket tan an pawimawh," tiin Archer, Stone leh Wood te awm lo pawi a tih thu a sawi.

Captain vs captain
Second Test bik thlirlet chuan England captain Joe Root-a'n India captain Virat Kohli aiin run a siam tam zawk. Root hian 180 leh 33 runs a siam.

Hetihlai hian Kohli erawhin 42 leh 20 runs chauh a siam. Chutihrualin captain pahnih buk tur a nih chuan batting chauh ni loin thutlukna an siam dan thlir tel a ṭul a, Kohli a che ṭha zawk.

India captain-in second innings-a 298/8dec runs an siam laia a duh tawk (declare) ngam avangin hnehna an chang a tih theih. Chutihrualin batting hrim hrim thlir chuan Root a ṭha zawk a, Test batting ranking-ah pawh pahnihnaah awmin New Zealand captain Kane Williamson chiah a tluk lo.

January 1, 2020 hnu lamah Root hian Test match vawi 18 a khel a, 1,741 runs siamin 58.03 runs a average pha. Kohli erawh Test match vawi 10-ah 407 runs chauh a siam a, chawhrualin 23.94 runs chauh a siam. Test batting ranking-ah pawh Kohli hi panganaah a tla thla tawh a ni.

Squad
India: Virat Kohli (captain), Rohit Sharma, Cheteshwar Pujara, Mayank Agarwal, Ajinkya Rahane, Hanuma Vihari, Rishabh Pant (wicket-keeper), R Ashwin, Ravindra Jadeja, Axar Patel, Jasprit Bumrah, Ishant Sharma, Mohammed Shami, Mohammed Siraj, Umesh Yadav, KL Rahul, Wriddhiman Saha, Abhimanyu Easwaran, Prithvi Shaw, Suryakumar Yadav

England: Joe Root (captain), Moeen Ali, James Anderson, Jonathan Bairstow, Rory Burns, Jos Buttler (wicketkeeper), Sam Curran, Haseeb Hameed, Dan Lawrence, Saqib Mahmood, Dawid Malan, Craig Overton, Ollie Pope, Ollie Robinson