September 12-ah Futsal World Cup

FIFA Futsal World Cup vawi kuana chu September 12 leh October 3, 2021 inkar hian Lithuania-ah khelh a ni dawn. Khawmualpui paruk aṭangin ram 24 an tel dawn a, group parukah ṭhendarh a ni.

Inelna hi khawpui pathum Vilnius, Kaunas leh Klaipeda-ah te khelh a ni dawn a, an stadium khelhna tur Avia Solutions Group Arena, Zalgiris Arena leh Svyturys Arena hi basketball leh concert neihna hmun Futsal World Cup atana futsal khelhna tur atana siam danglam hret a ni hlawm.

Asia aṭangin team panga Iran, Japan, Uzbekistan, Thailand leh Vietnam; Africa aṭangin team thum Angola, Egypt leh Morocco; South America aṭangin team pali Argentina, Brazil, Paraguay leh Venezuela; Central, North America and Caribbean aṭangin team pali Costa Rica, Guatemala, Panama leh United States leh Oceania aṭangin Solomon Islands te an tel dawn.

Europe-in team an thawh hnem ber a, inelna thlengtu Lithuania an kawl bawk avangin team sarih ngawt an thawh. Team paruk dangte chu Kazakhstan, Portugal, Russian National Futsal Team (RFU), Spain, Czech Republic leh Serbia te an ni.

FIFA Futsal World Cup hi kum 1989 aṭang daih tawh khan ṭan a ni tawh a, inelna neih hun hi siamrem hret hret niin tunah chuan kum li danah neih ṭhin a ni. Inelna ṭan kumah hian Netherlands-in an thleng a, final-ah Brazil-in inelna thlengtu Oranje hi 2-1 a hnehin an champion hmasa ber.