Palinaah Alexander Zverev

Alexander Zverev chuan Cincinnati Masters title a lak hnuin chanchin lawmawm a nei chhunzawm. Mipa tennis thuneitu sang Association of Tennis Professionals (ATP) ranking tih chhuah tharah palina dinhmun a luah.

German tlangval hian point 8,240 a hmu a, a chunga awm Rafael Nadal (7,815) a tlan pel a ni. A chungah hian a ṭha pathum - Novak Djokovic, Daniil Medvedev leh Stefanos Tsitsipas te an la awm. US Open hma chuan an dinhmun a inthlak hman a rinawm tawh lo.

Tokyo 2020 leh Cincinnati Masters champion Zverev hi tun hnaiah a khel ṭha, a vawi khat nan Grand Slam title pawh a lak ve mai a beiseiawm viau. Mahse, tun hma lama a chetsual tawh ṭhinna a nih avangin a ṭawng fimkhur hle.

Kum 24 mi Zverev chuan, "Season hmasa khan US Open hi ṭha takin ka lo khel tawh, nomawi pawh ka chawi teuh hle a nih kha, mahse ka hlawhtling ta lo. Kuminah pawh theih tawp ka chhuah leh dawn a, a sang thei ang ber thlen ka tum ang.

"Tun dinhmunah chuan champion sawi ngam tur ka ni lo, a pawimawh hmasa chu ṭha taka khelh a ni. Tlang taka sawi chuan Novak Djokovic hi champion tura rinkai ber a ni a, midang tan kawng a inhawng ve lo tihna erawh a ni chuang lo," a ti.