Milan chakna Brahim Diaz

AC Milan chuan Thawhṭanni zan khan Serie A bul an ṭan ve chauh a, forward Brahim Diaz-a goal khat hmangin an mikhualna ramah Sampdoria chu 1-0 in an luhchhuah.

Milan tan striker thar Olivier Giroud leh goalkeeper lak luh thar Mike Maignan ten bul an ṭan nghal. An khel chhe lo, club thar tana point thum hmuh nghal hi chanchin lawmawm a ni ang - Zlatan Ibrahimovic a inhliam avangin Giroud mawhphurhna a sang zel ang.

Defender rinrawl Simon Kjaer chu Sampdoria captain Maya Yoshida nen ball an inchuhna lamah inhliam mah se Denmark captain hi thlak ngai loin a khel tluan thei - Japanese defender pawh thlak a ngai lo.

AC Milan coach Stefano Pioli chuan, "Sampdoria khan tlarhnung an rem phui ṭha hle. Goal khung theihna ramchang insiam a harsa viau, khatiang kara goal pawimawh khung theitu Diaz khan fak a phu takzet.

"Player ṭhenkhat hliam an la awm avangin kan ṭhat dan berin kan la khel thei rih lo, chutih rualin inbuatsaihna kan neih ṭhat chu a takin khelmualah kan lantir thei a, a lawmawm hle. Inkhel pumpui thlir chuan mimalah ni loin team thawhhona kha kan innghahna chu a ni," tiin a sawi.

Season hmasa khan Milan hian nomawi an beisei phak, mahse season chawhnu lamah an zuih avangin pahnihnaah an tawp. Pioli-a naute hian ngelnghet taka an khel thei a nih chuan champion an tum ngam ang.

Serie A match hmasa berah hian team pariat - Inter Milan, Lazio, AS Roma, Napoli, Bologna, Sassuolo, Atalanta leh Milan ten hnehna an chang nghal a ni.