Awadhe Warriors ngam loh Pune 7 Aces

Pune 7 Aces chuan Premier Badminton League (PBL) semifinal khel turin an dinhmun an siamṭha ta. Thawhṭanni zan league round inkhelah Pune hian Awadhe Warriors chu 4-1 a hnehin table lamah pathumna dinhmun an luah.

Gachibowli Indoor Stadium, Hyderabad-a inkhelah Pune hian men's singles match hnih bakah mixed doubles leh women's singles huangah hnehna an chang thei a, men's doubles-ah chauh an chak lo.

Chak lo Awadhe Warriors hi palinaah an nek chhuak a, point 14 neiin an hnuaia awm Bengaluru Raptors chuan an la rawn lehpel thei. Pune 7 Aces erawh point 18 neiin pahnihna North Eastern Warriors nen an point a inzat, semifinal khel turin an dinhmun an sawhnghet tawh hle.