Norwich-in United defender an la

Premier League kai thar Norwich City chuan Manchester United aṭangin season khat chhung atan Brandon Williams chu loan hmangin an lalut. Canaries hian loan hmangin Billy Gilmour an lalut tawh a, Williams an lak leh takah chuan English club aṭangin loan hmangin player an lak belh thei tawh lo.

Williams chuan, "Team ṭha tak an ni a, an khelh dan hi ka ril rem zawng a ni," tiin Canaries tana khelh a châk tawh thu a sawi. Man United hian loan fee atan pound maktaduai hnih an beisei a, amaherawhchu loan fee atan pound maktaduai 1.7-ah an inrem ta zawk.

November 2019-ah kha chuan ke dinglam pet Williams hi United left back ṭha berah ngaih a ni hman a, amaherawhchu Luke Shaw-a'n harhtharna a chan hnuah an inkar a zau ta deuh. Season liam ta khan United-in Alex Telles an lalut a, Williams tan United first team-a tel pha leh tur chuan Norwich-ah season ṭha tak a hman a ṭul ang.