Bayern khingpui tur Bremer

Bayern Munich chuan zanin 11:45 hian Weserstadion-ah Bremer SV nen DFB Pokal first round an khel dawn. German Cup first round-ah team 64 an tel a, match 31 khelh tawh niin Bavarians leh Bremer te inkhel tur hi Covid-19 vangin an sawn.

Bremer hi January 1, 1906-a din theih tawh ni mah se Bremen Liga-ah an awm a, hriatthiam awlsam dan tur chuan German fifth division club an ni a, German champion an mikhual tur hi an tan chuan chanchin chhinchhiah tlak a ni ang.

Left back Sebastian Kmiec chuan, "Amateur footballer ka nihna anga ka chanchina ropui ber tur a ni," tiin a sawi. Kmiec hi assistant coach a ni nghal bawk a, head coach chu Benjamin Eta a ni a, a hna ber chu sport leh history zirtir a ni daih thung.

Season liam ta khan mak takin Bayern Munich hi second round-ah an tla a, an hneh loh chu Holstein Kiel an ni. Tuna a head coach thar Julian Nagelsmann kaihhruai RB Leipzig erawhin final an thleng a, Borussia Dortmund an hneh lo.

Bavarians tan ni 13 chhunga match li an khelhna tur a nih dawn avangin Nagelsmann tan player siksawi a ṭul dawn a, chutihrualin team nem zawk pawh khelhtir se chak ngei an tum ang.