Shakhtar khelmualah beiseina nen Monaco
Champions League group stage khel tur chu zaninah hriat kim a ni dawn ta - nizanah playoff second leg match thum a awm a, result kan hre hman lo.
Zaninah playoff second leg match thum khelh tur a awm leh dawn a, Champions League khel tur chinfel a ni ang - match thum hi zan dar 12:30-ah vek khelh tur a ni a, Shakhtar Donetsk-in AS Monaco an mikhual tur chu inkhel ngaihven hlawh zual a ni.
Brondby IF leh Red Bull Salzburg inkhel tur pawh inkhel hmuhnawm tak hmuh a beiseiawm a, Dinamo Zagreb leh Sheriff Tiraspol inkhel erawh thilmak a thleng a nih loh chuan result danglam beisei a harsa.
Shakhtar vs Monaco
Ukrainian club Shakhtar-in first leg-ah 1-0 in AS Monaco an hneh tawh a, Ukrainian Premier League-ah 3-0 a Chornomorets Odesa an sawp zui bawk avangin an boruak ṭhat vanglai tak a ni - inelna hrang hranga an match hnuhnung pakuaah vawi riat an chak thei.
Monaco erawh an boruak fuh lai a ni lo - Champions League qualifying third round-a Sparta Prague an hneh hnuah chak an nei leh tawh lo! League-ah a zawnin Lorient leh RC Lens an hneh tawh lo a, Shakhtar-in an hmuak leh mek. Zanin hi an tan insiamṭhatna hun ṭha a ni.
Shakhtar tan rawlthar ṭhangduang Lassina Traoré leh first leg-a goal khungtu Pedrinho an pawimawh leh dawn a, player pahnih hian an theihna anga an khelhchhuah chuan result ṭha an hlawh chhuak ang - Monaco hian Aleksandr Golovin, Wissam Ben Yedder leh Kevin Volland te ho an nei tih hriat erawh a ṭha.
Brondby vs Salzburg
Salzburg-in first leg-ah 2-1 in hnehna an chang a, tun season aṭangin away goal rule hman a nih tawh loh avangin Brondby tan khualmuala goal khat an khung hian goal khat aia tam hlutna a keng tawh chuang lo.
Danish club-in mahni mualah khel dawn mah se dah san an har. Salzburg laka an tlawm hnu lawk hian league match-ah OB chu 2-2 in an inhnehtawkpui a, Danish champion hian an match hnuhnung pakuaah chak an nei miah lo - vawi ruk draw result neiin vawi thum an tlawm.
Hetihlai hian Salzburg erawh Brondby an hneh hnuah Austrian Bundesliga khelin Austria Klagenfurt chu 3-1 in an hneh a, inelna hrang hranga an match hnuhnung pakuaah an chak vek - vawi 24 goal an khung a, vawi ruk chiah an chhuah. Zaninah pawh mikhual ni chunga chak tura ringtu an ngah zawk a nih pawhin a awm lo hran lo.
Zagreb vs Sheriff
Champions League playoff first leg-a beisei loh result zingah Sheriff-in 3-0 a Dinamo an hneh hi a langsar ber niin a lang a, Croatian club Dinamo-in mahni mualah second leg khel dawn mah se si thum an phurh sa avangin tlang tur chuan thilmak a thlen tel a ngai tawh.
Sheriff Tiraspol hian first qualifying round aṭangin inelna an hmachhawn a, KF Teuta Durres leh FC Alashkert an hneh hnuah Red Star Belgrade chu third round-ah an hneh a, Dinamo an hneh leh a, inrintawkna an nei sang viau ang tih a chiang - Moldovan club zinga Champions League group stage khel hmasa ber ni thei dinhmunah an ding mek a, he thawnthu ngaihnawm hi an chhunzawm zel a nih pawhin a mak lo ang.
Dinamo Zagreb-in first round aṭang thoa bul ṭanin Valur Reykjavik, Omonia Nicosia leh Legia Warsaw an hneh a, playoff first leg-ah an mualpho thung. Mahse, league lamah NK Lokomotiva chu 1-0 a hnehin an insiamṭha leh tawh a, zaninah thilmak thlentir turin Lovro Majer, Mislav Oršic leh Arijan Ademi te ho an chet ṭhat a ṭul ang.