Premier League club-in player chelh an tum

August 30 - September 8 chhung hian international match khelh a ni dawn a, Covid-19 inkhuahkhirhna avangin Premier League club ṭhenkhatin an player chhuah an remti lo.

United Kingdom chhungah inkhel entu awm mah se sorkarin 'red list'-a puan rama zinte chu dan angin ni 10 chhung khung hran tur a ni a, football player tana hriatthiamna a awm a nih ngawt loh chuan club-in an player-te kaltir an remti dawn lo.

Football Association leh Premier League thuneitute chuan UK inkhuahkhirhna dan chungchangah Department for Digital, Culture, Media and Sport (DCMS) nen an indawr a, he thuziah lai hian thutlukna hriat a la ni lo.

Player chhuah phal lo club zingah Liverpool an tel. Reds player pali Egypt forward Mohamed Salah, Brazil trio Alisson, Fabinho leh Roberto Firmino te chu an ram UK 'red list'-ah an tel avangin chhuah an remti lo.

Chutihrualin Egypt-in khualmuala an hmachhawn tur Gabon erawh UK red list-ah an tel lo a, Liverpool hian Pharaohs match hnih neih tura hnuhnung zawkah Salah kal an remti thung.

South America ramten World Cup qualifier match thum an khel dawn. Match hnuhnung ber hi Argentina-in September 10, Zirtawpni zing dar 5:00-ah Bolivia an hmachhawn dawn a, zing dar 6:00-ah Brazil leh Peru te an inkhel bawk ang.

September 11, Inrinniah Premier League match riat ngawt a awm dawn a, South America-a World Cup qualifier khel tan chuan let hman ngaihna a awm lo. Chutihrualin Premier League player pakua awmna Brazil hian Argentina, Chile leh Peru te an hmachhawn dawn a, ram pali hi UK red list-ah an awm ve bawk.

Ṭum dang zawng aiin international break hian Premier League-ah nghawng a nei lian dawn a, player pawimawhin Covid-19 an kai a nih ngat phei chuan result thlengin a danglam phah thei ang. August 16-22, 2021 chhung khan Premier League-in test 3,060 a kalpui a, mi 16 ngawt an positive. Chung zingah chuan Christian Pulisic leh Ben White te an tel a, international break lai pawh hian positive awm belh tura ngaih a ni.