AFC Cup : Bagan-in knockout stage an lut

Nimin tlai khan ATK Mohun Bagan leh Bashundhara Kings te 1-1 in an inhnehtawk a, Indian club hian AFC Cup knockout stage an lut. Group khat aṭangin pakhat chauh tlang tur a nih avangin nizana Bengaluru leh Maziya te inkhel result-in awmzia a nei lo.

Maldives National Football Stadium-a inkhelah hian Mariners hian draw chiah mamawh mah se Bangladesh club-in Jonathan Fernandes hmangin minute 27-naah an khung hmasa. Amaherawhchu first injury time-ah Kings winger Sushanto Tripura hnawhchhuah a ni a, Bagan-in an tam zawkna an hmang ṭangkai zui bawk.

Second half-ah Bagan-in an tamna an hmang ṭangkai a, David Williams-a'n minute 62-naah siphurh a sut. Kolkata club dinhmun a ṭhat leh zawk avangin Bashundhara Kings-in na takin an nawr let a, goal ban te pet per nachungin goal dang a luh belh lo. Bagan-in point khat hlu tak an hlawh chhuak.

Mohun Bagan hian inter zone playoff semifinal an thleng a, vawiina inkhel tur Nasaf (Uzbekistan) leh Ahal (Turkmenistan) inkhela chak zawk an hmachhawn dawn. September 22-ah semifinal hi khelh tur a ni a, hnehna an chang a nih chuan October 20 hian Hong Kong club Lee Man nen playoff final an khel ang.

Playoff final-a an chak hian AFC Cup Final an lut dawn chauh a, Indian club hian nomawi chawi tur chuan vawi thum chak a la ngai dawn tihna a ni. Nomawi inchuhna hi November 5, 2021-ah khelh a ni ang.