Tun aia sang zawk thlen ka tum - Remsiami

Tokyo 2020-a India hockey hmeichhe team semifinal thlen puitu Lalremsiami Hmar chuan nimin khan Mizoram a lo thleng a, Lengpuiah ropui taka hmuah a ni. Siami chuan, "Tun hi ka tawpna tur a ni lo a, a aia sang zawk thlen tumin theihtawp ka chhuah zel ang," tiin hmasawn zel a tum thu a sawi.

Vawiin hian Vanapa Hall-ah sorkar ruahmannain lawmpuina hun hman a ni dawn. August 27, Zirtawpniah Hockey Mizoram chuan Aijal Club-ah sawm bikte nen lawmna hun an hmang leh ang, ruahman dan chuan Inrinniah an khua Kolasib a pan dawn a ni.

Remsiami inzir chhuahna hi Thenzawl a ni a, Mizote tan infiamna khawvelah kawng a awm tih a taka lantirtu a ni. Vanglaini zawhna chhangin Remsiami chuan, "Mizoram ka chhuahsan tirh pawh khan mi tam takin min zawt ve ṭhin, ground kan neih dan ngaihtuah chuan hetiang dinhmun kan thleng ve mai hi a mâk ka ti zawk hial," tiin a thlen chinah lawmthu a sawi.

Kolasib nula chuan amah zirtirtu coach-te leh amah kaihruaitu senior player-te vanga tun dinhmun thleng thei a nih thu a sawi tel bawk. Olympic-a hlawhtlinna a chan avangin Mizoram sorkar chuan SYS hnuaiah Hockey Chief Coach hna a pe.

Remsiami chuan, "Railway-a hnathawk lai ka ni a, Mizoram sorkarin hna min pe bawk. Ka awm zelna tur zawk ka la sawi thei lo, chhungte nan kan sawi khawm ang. Min duhsaktu Mizoram sorkar, Hockey Mizoram, coach leh senior player bakah ka tana ṭawngṭai ṭhintu leh min duhsaktu Mizo mipuite chungah lawmthu ka sawi tak meuh meuh a ni," tiin a sawi.

Tokyo 2020
Kolasib naupang, vaivut kara hockey khel ṭhin kha Thenzawl Hockey Training Center-ah chher hriam a ni a, tunah zet chuan khawvel huap infiamna khawmpui lian Olympic meuh a khel tawh - inelna hmachhawn hma khan Remsiami hian a duhthusam ṭhin chu a taka a thlen thu a sawi tawh.

Kum 2019 khan Japan ramah hian an lo feh chhuak tawh a, hemi ṭum hian a pa Lalthansanga chu a thi, inelna hmachhawn laklawh a nih avangin a pa ruang a kil ve thei lo - Japan ramah vek Olympic khelin a zin leh ta a ni a, a pa tan hian a hun hlu ber chu a hlan.

Siami chuan, "Ka pa khan Olympic ka khel lai min hmu se chu min chhuang ve ngawt ang, van aṭangin min lo thlir reng ang tih ka ring ve ṭhin," tiin Vanglaini a lo hrilh tawh a, dinhmun sang a chan hnuah pawh hun harsa a tawh laia enkawltu a pa a hre reng.

Kum 21 mi chauh la ni mah se Siami hian India tan match 64 a khelh aṭangin goal 23 a khung der tawh a, hliam leh harsatna dang a tawk a nih loh chuan match tam zawk a khelh zel a beiseiawm - tunah hian club lamah chuan Railways Sports Promotion Board tan a khel mek a ni.

Lawmna thilpek
Mizoram sorkar chuan Tokyo 2020 a khel dawn tih a chian khan Remsiami hi Rs nuai 20 a pek tur thu a lo tichiang tawh a, ṭhenkhat hi a pe tawh a, a pek bak la awm hi a pe leh ang; Olympic palina an nih hnu khan chief minister Zoramthanga chuan Rs nuai 25 dang an pek tur thu a sawi bawk.

Siami hi sorkarin a lo intiam tawh angin hna leh in hmun a pe bawk - Sports & Youth Sevices Department hnuaiah Chief Coach (Hockey) nihna a pe bawk a, a hna thar hi vawiin hian an nemnghet ang. Madhya Pradesh chief minister Shivraj Singh Chouhan chuan, India Women's Hockey team player zawng zawng tan Rs nuai 31 ṭheuh an pek tur thu a sawi tawh, a hnathawhna Railway chuan Rs nuai 35 an pe dawn bawk.

Pawisa bakah thilpek tam tak a dawng a, chung zingah chuan Tata chuan India player zinga Tokyo 2020-a palina nite hnenah Altroz Car an pek vek tur thu an lo sawi tawh bawk, malsawmna hrang hrangin a la vur zel a rinawm.

Lalremsiami Hmar Zinkawng
2000 : Lalremsiami Hmar pian kum.
2011 : Kum 11 mi chauh niin Thenzawl Hockey Academy a zawm.
2016 : National Hockey Academy a awm turin thlan a ni a, November thlaah a lut.
2017 : India Junior Camp tana training a nei lai chu India coach Harendra Singh-a'n hmu fuhin, senior team tana khel turin a ko.
2017 : November thlaah India tan Asian Cup a khel a, match zawng zawngah inlan vekin goal hnih a khung; India a champion pui.
2018 : April 4 - 15 chhunga neih 2018 Commonwealth Games-ah India tan koh a ni a, kum 17 mi chauh a la nih avangin squad player naupang ber a ni; Malaysia 4-1 a an sawp ṭumin goal khat a khung.
2018 : Women’s Hockey World Cup 2018-ah India aiawhin a inlan a, kum naupang ber a ni zel. India hi semifinal a thlen pui a, Italy an hneh ṭumin goal a khung.
2018 : Asian Games-ah India ai a awh leh, Asian ramte inelna lianah hian goal li khungin, India chu silver medal a vuak chhuahpui a ni. Mizo infiammi zinga Asian Games medal la thei hmasa ber a ni nghal.
2018 : 2018 Summer Youth Olympic Games-ah India tan silver medal a dawng.
2019 : Japan-a Women's FIH Series Finals khelhah India chu pakhatna a nihpui, match tinah inlan vekin goal hnih a khung.
2019 : FIH Olympic Qualifier-ah India tan a inlan a, playoff khel turin an tling.
2019 : Olympic Qualifier-ah United States nen an inhmachhawn a, inkhel pahnih belhkhawmah hnehna changin Olympic khel turin an tling.
2019 : India ram chanchinbu lian Times of India chuan Emerging player of the Year atan a thlang.
2020 : Khawvel puma hmeichhe hockey player chhuak thar beiseiawm ber FIH Rising Star of the Year 2019 atan an thlang.
2021 : Tokyo Olympic inbuatsaih nan Argentina leh Germany-ah India tan a feh chhuak.
2021 : Khawvel infiamna khawmpui lian ber Tokyo Olympic 2020-ah India aiawhin a kal, khawvel huap inelna lianah India chu palina a nihpui.