Jamshedpur-ah MPL best defender

ISL club Jamshedpur FC chuan Mizoram Premier League Season 7 best defender PC Laldinpuia an lalut. Samthang tlangval Dinpuia chuan, "ISL harsatzia ka hria a, khelhna hmun chang turin theihtawp ka chhuah ang," tiin Vanglaini a hrilh a, amah hi MPL chhul chhuak tia sawi theih a ni.

Bethlehem Vengthlanga cheng Dinpuia hian Jamshedpur tan hian kum thum daih contract a ziak. Jamshedpur-ah hian Mizo pathum Ricky Lallawmawma, Laldinliana Renthlei leh William Lalnunfela te an awm sa a, an pali hian MPL-ah tawnhriat an nei vek.

Dinpuia hi Aizawl DFA hnuaia club Bethlehem VT leh FC Bethlehem tana a khelh laiin striker position-ah a khel ṭhin. MPL-a BVT an inpettlin hnuah season hnih chhung a khelhsak a, MPL5-ah final luhpui mah se Chanmari FC lakah an vanduai.

MPL club Zo United leh Luangmual FC tana khel tawh Dinpuia hian BVT aṭangin Chhinga Veng FC a zawm a, MPL season hnuhnung berah Electric Veng FC tan a khel leh bawk. Samthang tlangval hian Chhinga Veng leh Electric Veng te MPL7 leh MPL8-ah final thlenpui mah se Aizawl FC lakah an vanduai ve ve.

Dinpuia hian I League khel turin Aizawl FC a zawm a, Mizo defender hian foreign striker lakah pawh a theihna sang tak a lantir theih avangin Indian football-ah hmelhriat a hlawh phah. Jamshedpur defender thar hi Mizoram tlarhnungah pawh rinrawl a ni a, Santosh Trophy inelnaah ṭum thum Mizoram tan a khel a ni.