Zanin dar 9:30-ah Champions League draw

UEFA hnuaia club inelna sang ber Champions League fixtures chu zanin dar 9:30 hian Istanbul, Turkey-ah sem fel a ni dawn. Chelsea legend pahnih Branislav Ivanovic leh Michael Essien te chuan draw hi an pui ang.

Champions League group stage hi September 14-ah khelh ṭan a ni dawn a, final hi May 28, 2022-ah khelh tur niin Petersburg Stadium, Russia-ah khelh a ni ang. UCL draw rual hian UEFA player of the year, coach of the year bakah season liam ta Champions League-a position tina ti ṭha ber thlan chhuah a ni dawn.

Team 32
UCL group stage-ah hian team 26 chu an tling nghal a, hmun ruak paruk dang chu qualifying hmanga zawn a ni. Qualifying hi champions path leh league path-ah ṭhen hran a ni a, champion path-ah hi chuan ram khat champion chauh tel theih a ni a, hmun ruak pali an chang.

League path erawh Europe league ṭha zinga tel pha champion pha chiah lote khelh ṭhin a ni a, champion path ai hian sulhnu an nei ṭha zawk. Tun ṭumah pawh league path aṭanga tling chu Benfica an ni a, Monaco leh Shakhtar Donetsk inkhela chak zawk an tling dawn bawk. An vai hian UCL-ah tawnhriat ṭha tak an nei vek.

Draw kalphung
UCL group stage-ah hian team 32 an awm a, group riatah ṭhen darh niin group khatah team pali zel an awm. Team pali te hi pot 1, 2, 3 leh 4 a mi te an ni ang. Pot 1-ah UCL leh EL champion bakah Europe League sang paruk champion an awm. Pot dang zawng hi chu UEFA coefficient ranking hmanga ṭhen darh a ni thung.

Group stage-ah hian ram khat club an awm kawp thei lo a, chumi awmzia chu pot 1-a awm Manchester City leh pot 2-a mi Manchester United te hi pawh kawp theih an ni lo.

Messi leh PSG
Lionel Messi-a'n PSG a zawm avangin French club hian ngaihven a hlawh dawn. Season liam ta khan PSG hi an champion lo a, Messi club hlui Barcelona an champion bik lo. Hemi a nih avang hian PSG leh Barca te hi Pot 2 ve veah an awm a, group khatah an awm thei dawn lo.

Chutihrualin UCL champion rinkai zinga mi PSG hi an vanduai chuan group harsa takah an awm thei a, French club hi Manchester City, Ajax leh AC Milan te nen an awm khawm a nih chuan knockout stage a awlsam lo ang.

Zanina an puan tur chawimawina
UEFA Men's Player of the Year
UEFA Women's Player of the Year
UEFA Men's Coach of the Year
UEFA Women's Coach of the Year

Mipa leh Hmeichhia
Goalkeeper of the 2020/21 UCL season
Defender of the 2020/21 UCL season
Midfielder of the 2020/21 UCL season
Forward of the 2020/21 UCL season