2021 UEFA President's Award dawng tur Eriksen-a nunna chhantute

Denmark captain Simon Kjaer leh medical team-te chuan Euro 2020-a Danish midfielder Christian Eriksen nunna an chhan avangin kum 2021 UEFA President's Award an dawng dawn.

June 12 khan Euro 2020 group match inkhelah Finland-in Denmark 1-0 in an hneh a, Copenhagen-a inkhelah hian result aiin Danish midfielder Christian Eriksen nikhaw hre loa tluin ngaihven a hlawh zawk.

Kum 29 mi Eriksen hi thi thei dinhmunah a ding a, a lungphu pawh chawl hman hial mah se khawl (defibrillator) hmanga an deh hnuah a lungphu an hmu leh a ni. Danish midfielder hian a lung pui turin ICD (implantable cardioverter defibrillator) a taksaah a vuah tawh a, harsatna nei tawh lo mah se khelmualah a la kir lo.

Kum 32 mi Simon Kjaer chuan, "Kan dam chhungin kan hre tawh ang. Team angin kan thawk ṭha a, kan ṭangkai theihna tura kan hriatah kan theihna zawng zawng kan chhuah.

"Khelmual pawn leh chhunga team hruaitu nih hi ka tum ṭhin a, footballer kan nihna angin kan inpumkhatna pawh a ṭha. Ṭhiante pui theia ka awm kha ka lawm. Christian nen hian kum tak tak kan inhre tawh a ni," tiin a sawi.

Euro 2020-a chief medical officer Mogens Kreutzfeldt chuan, "Ti tura min tih leh kan zir angin kan tihtur kha rang takin kan ti a ni," tiin a sawi ve bawk. UEFA president Aleksander Ceferin chuan, "Nunna hlutzia an lantir a, nunna chhan turin an theihna zawng zawng an chhuah," tiin chawimawi an phu thu a sawi ve bawk.