UEFA Men's Player of the Year : Premier League ‘trio’ zingah tunge dawng dawn?

European football-a player ṭha ber kan hre thuai dawn a, zanin Champions League draw neih rual hian UEFA Men's Player of the Year puan a ni dawn.

European football-a mimal chawimawina sang ber dawng tur hian Premier League 'trio' Kevin De Bruyne, Jorginho leh N'Golo Kanté te hming chhawpchhuah a ni a, top three-a midfielder vek an lan vawi khatna a ni a, hei vang ringawt pawh hian ngaihven a hlawh lehzual.

Liverpool defender chhuanvawr Virgil van Dijk chuan 2018-19 season khan he award hi a lo dawng tawh a, kum 2011 aṭanga sem ṭan chawimawina Premier League aṭanga dawng thei awmchhun a ni.

Kuminah erawh Premier League player-in he award hi an hawn ngei dawn tih a chiang a, tuin nge chawimawina nopui chu dawm ang? tih hi zawhna chu a ni ta - a chhanna pek kan ni thuai dawn e.

Kevin De Bruyne (Manchester City & Belgium)
Premier League inkhel en ṭhinte tan Kevin De Bruyne chanchin sawi nawn a ngai lo. Kum 30 mi midfielder hi club ṭha Manchester City tana inkhel khaidingtu ni thei a ni a, Belgian midfielder telna City leh tel lohna City chu a danglam ṭhin.

KDB hian season hman zawh takah khan City tan inelna hrang hrangah match 40 khelin goal 10 a khung a, assist vawi 18 a nei bawk - Premier League leh League Cup-ah a champion pui a, FA Cup leh Champions League final-ah an chak lo thung.

Premier League-a mimal chawimawina sang ber PFA Players' Player of the Year award a dawng a, PFA Premier League Team of the Year-ah a lang phak bawk - chutihrual chuan an chak zawh lohna Champions League final-a an hneh loh Chelsea player pahnihte chu award dawng tura a elpui an nih avangin a harsa dawn.

KDB-a'n Euro 2020-ah Belgium jersey a ha a, world number 1 ni chunga inelna an hmachhawn chungin quarterfinal an paltlang zo lo thung - an hneh loh team hi Jorginho telna Italy an ni a, Euro semifinal thlen phak loh hian award dawng tura KDB dinhmun a tihniam hreta ngaih a ni.

Jorginho (Chelsea & Italy)
Frank Lampard-a hnuaia beisei anga hmun chang thei lo player hi Ballon d'Or thlengin a hming lam rik a ni ta. Jorginho hian season hman zawh takah khan Chelsea tan inelna hrang hrangah match 43 khelin goal riat a khung a, assist vawi hnih a nei bawk.

Kum 29 mi midfielder hi statistic hmanga a thiamna sawifiah chi erawh a ni lo - inkhel khaidingtu a ni a, UEFA Champions League Squad of the Season leh UEFA European Championship Team of the Tournament-ah a lan ve ve avangin a tikimtu satliah a ni lo tih a chiang.

Italy international hian Chelsea tan Champions League nomawi a chawi bakah Euro-ah Italy a champion pui a, Blues tan Champions League nomawi an chawina kawngah match khatah chiah bul a ṭan lo a, Italy tan Euro 2020-ah khan bul a ṭan vek thung.

Jorginho-a'n club tan nomawi a hlawh chhuak a ni mai lo a, ram tan nomawi ngaihhlut a hlawhchhuah tel avangin award dawng tura rinkai ber a ni - ram leh club tan a che ṭha ve ve tlat!

N'Golo Kanté (Chelsea & France)
Player inngaitlawm leh fel an sawi apiangin Kante hming lam tel a ni ṭhin a, European midfielder ṭha an sawi apiangin lam hmaih a ni ngai ta lo bawk - Kante hian Champions League nomawi an chawi theih nan a thawhhlawk hle.

French midfielder hi semifinal-a Real Madrid an hnehna inkhel pahnihah man of the match atan thlan a ni ve ve a, final-a Manchester City an hneh ṭumin man of the match a ni bawk. Nomawi a chawi a ni satliah lo a, a team tan a thawk chhuak a ni.

Kum 30 mi midfielder hian season hman zawh takah khan inelna hrang hrangah match 48 khelin assist vawi thum a nei a, a team tana a ṭangkaizia chu a inkhel en ṭhinten an hrechiang ber.

Kante hian Euro 2020-ah erawh France chu round of 16 a paltlangpui zo lo a, Switzerland-in penalty hmangin an pet chhuak. France tana result ṭha a hlawhchhuah loh hi Kante-a'n a tuar thei a, Blues tana a khelhpui Jorginho-a'n Champions League bakah Euro nomawi a neih tel avangin Kante tan chance a ṭha tawk lo.