Rangers leh Celtic tan Europe a hnai
European football-a club inelna sang ber dawttu Europa League playoff second leg chu zaninah khelh ṭan a ni leh dawn ta a, Scottish club lian Rangers leh Celtic an inlan dawn.
Rangers-in zanin dar 8:30-ah Alashkert an lenchilh dawn a, Armenian club hi first leg-ah 1-0 a an lo hneh tawh avangin Steven Gerrard-a nauten tlang beiseina nen Armenia an pan ang.
Zanin dar 11:45-a Celtic-in AZ Alkmaar an lenchilh tur hi club pahnih hming en mai chuan en châkawm a tling a, mahse, Celtic Park-ah 2-0 a Scottish club an chak tawh avangin AZ tan beiseina a tlem.
Rangers an insiamṭha
Season hmasaah tlawm nei lo chungin league-ah Rangers an champion a, tun season-ah pawh 3-0 a Livingston hnehin bul an ṭan nghal. Mahse, Champions League third qualifying round aṭangin Malmo-in an pet chhuak a, league lamah Dundee United chuan 1-0 in an hneh bawk.
Rangers indawmkun chhung erawh a rei lo. League Cup-a Dunfermline Athletic chu 5-0 a an sawp hnuin Alashkert hi 1-0 in an hneh a, league-ah Ross County chu 4-2 in an hneh zui. Zanina an hmachhawn tur Armenian Premier League champion Alashkert hi an match hnuhnung pakuaah vawi khat chiah an chak!
Chutihrual chuan Rangers hian Covid-19 kai an squad-ah an nei thar a, an ṭhat dan berin Armenia an pan thei dawn lo. Player-te hming hi tarlan a ni lem lo a, Scottish sorkar dan angin anmahni hnaihtute nen khunghran an ni dawn a ni.
Celtic dinhmun
Season hmasaah Celtic-in Rangers tluk loin Scottish football-a an rorelna chu pheh thlak sakin an awm a, coach thar Ange Postecoglou enkawlna hnuaia an bul ṭan dan erawh duhawm lo tak a ni.
Champions League qualifier lamah Midtjylland an ngam lo phawt a, league-ah Hearts ngam loin bul an ṭan zui - hemi hnuah erawh Celtic an insiamṭha a, inelna hrang hranga an match hnuhnung parukah an chak vek!
Zaninah pawh goal hnih nei sa tih inhre chungin Celtic an zin ang a, Europa League khel phak tih inhre chunga haw an beisei ang - Pathianni zanah Rangers nen Old Firm derby an khel zui dawn a, boruak ṭhat nan chak an mamawh tel. Dutch club AZ-in tun season-ah match hnih chiah khelh an la nei a, an chak lo ve ve - an season siamṭha turin chak an mamawh.
Ngaihven hlawh
Zanin Europa League playoff-ah European football-a club langsar inlan tur an awm nual. Turkish club ṭha Fenerbahce chuan zanin dar 9:30-ah HJK Helsinki an lenchilh dawn a, Mesut Ozil awmna Fenerbahce hian first leg-ah 1-0 in hnehna an chang tawh.
Galatasaray-in first leg-ah rin loh takin Randers chu 1-1 in an inhnehtawkpui a, Danish club hi zanin dar 11:30-ah second leg khel turin an mikhual dawn.
Red Star Belgrade-in first leg-ah 4-0 ngawta CFR Cluj an sawp tawh avangin zanin dar 12:00-a an inkhel turah result danglam beisei a harsa a, Olympiakos-in zanin dar 12:15-a an lenchilh tur ŠK Slovan Bratislava hi first leg-ah 3-0 in an sawp tawh bawk.