Vieira enkawl Palace an tla

Arsenal legend Patrick Vieira enkawl Crystal Palace chu Watford 1-0 a hneh loin EFL Cup second round aṭanga petchhuah an ni. Goal awmchhun hi Ashley Fletcher-a'n minute 86-naa a khung a ni.

Thawhlehni zan inkhelah Premier League club Palace lamin ball chang tamin inkhel an thunun a, mahse striker Jean-Philippe Mateta goal khung tur chu ṭha takin keeper Ben Foster-a'n a lo dansak.

Goal a lut lo dawn niin a lang hman, hun tawp hma minute li chauh awm tawhah Fletcher-a'n Cucho Hernandez-a cross chu tun season bika a goal hmasa ber atan a khung a, a team chakna a ni nghal.

Vieira naute hian an league match hmasa berah Chelsea an ngam lo a, a hnuah kai thar Brentford nen goal awm loin an inhnehtawk. Season ṭan hma friendly match-a 3-1 zeta an hneh Watford hneh loin league cup aṭangin an tla a, insiamṭhat an mamawh hle.

Crystal Palace manager Patrick Vieira chuan, "Kan rilru put hmang kan siamṭhat a ngai, a bik takin kan khingpui goal kan nawr laiin rilru huaisen kan neih a ngai zual. Hun ṭha tam tak insiam chungin goal kan khung thei lo, chak tur chuan goal khung ngei a ngai si," tiin a sawi.

Watford manager Xisco Munoz chuan, "Ka naute khelh dan leh chet hmangah ka lawm hle. Kan khingpuiin na taka min nawr buai chungin hnehna kan chang thei, inkhel harsa takah pawh chak turin theihna kan nei tih a lang," tiin a sawi.