Robertson-a'n khaw dang a hawi lo

Liverpool left back Andy Robertson chuan Anfield chhuahsan tumna a nei lo a, Merseyside club tan kum 2026 thleng khel turin contract thar a ziak.

Kum 27 mi defender hian July 2017 khan Hull City aṭangin Liverpool hi pound maktaduai riatin a zawm a, tun hnaiah Reds player lei fuh ber pawl a ni.

Scotland captain hian kar khatah £60,000 a hlawh mek nia sawi a ni a, a contract thar ang chuan kar khatah£100,000 a hlawh ang - a theihna enin heti zata Reds-in an chelh thei hi vanneihna a ni.

Robertson chuan, "He club-ah hian a theih anga rei cham ka duh a, kei leh ka chhungte kan hlim em em reng a ni. Liverpool hi nuam kan ti a, kan zinkawng kan zawh ho zel thei tur hi ka lawm hle," a ti.

Khawvela left back ṭha ber pawl anga tam takin an ngaih Robertson hian Liverpool tan inelna hrang hrangah match 177 a khel a, tlarhnung ven piahlama goal nawr kawnga a ṭangkaina chu fak a hlawhna a ni - goal nga khungin assist vawi 37 a nei tawh.

Scottish defender hian Premier League, Champions League, FIFA Club World Cup leh UEFA Super Cup-ah Liverpool a champion pui tawh a, nomawi tam zawk chawi a beisei ang.

Robertson chuan, "Liverpool aia thlan tur zawk dang ka nei chuang lo a, he hmun hi ka tan chuan 'in' a ni. He club ka zawm tirh ni aṭanga vawiin thlenga min thlawptute chungah lawmthu ka sawi a, hlawhtlinna duhawm zawk kan chan theih nan a aia nasa lehzualin ka thawk ang," tiin social media lamah a tarlang.

Glasgow khaw chhuak tlangval hian pre-season friendly match-a Athletic Bilbao nen an inkhelh ṭumin hliam a tuar a, tun season-a Liverpool-in league match hnih an khelh tawhah a la inlan thei lo ve ve.