Spurs-in an la duhtawk lo

Tottenham Hotspur-in transfer bazar-ah an mit an len chhunzawm zel a, Wolverhampton Wanderers winger Adama Traoré nen sawizawm mek an ni. Kum 25 mi winger hi Wolves-ah Spurs coach Nuno Espírito Santo-a'n a lo enkawl tawh a, London club-ah hruai tel a duh.

Khawthlang media-ten an tarlan dan chuan Spurs hian loan-in Traoré hi an lalut phawt ang a, a hnuah a nghetin pound maktaduai 40-in an lei ang. Hetihlai hian Metz rawlthar Pape Matar Sarr chu Spurs hian an lalut bawk.

Sarr-a manah hian pound maktaduai 14.6 an inseng a, Senegalese midfielder hian season khat chu Ligue 1 lamah Metz tan loan-in a khel leh phawt ang.

Spurs hian Lyon attacking midfielder Houssem Aouar lakluh tumin inbiakna an neihpui bawk a, mahse, Champions League khelh a duh avangin Aouar hmin hi a awlsam dawn lo.

Aouar-a'n Champions League khelh a duh lai hian Spurs erawh Europa Conference League pawh khel lo thei dinhmunah an ding mek - zanin dar 12:15 hian ECL playoff second leg khel turin Pacos Ferreira an mikhual dawn a, first leg-ah 1-0 in an ngam tawh lo.

ECL playoff langsar dangah Jose Mourinho enkawl AS Roma chuan zanin dar 10:30 hian Trabzonspor an mikhual dawn bawk a, first leg-ah khan 2-1 in an lo hneh tawh.