Atalanta lamah Zappacosta a pem

Chelsea right back Davide Zappacosta chuan Chelsea chhuahsanin Serie A club Atalanta a zawm a, Italian defender man hi tarlan ni lo mah se pound maktaduai riat nia ngaih a ni.

European champion hian player hralhna aṭang ringawtin pound maktaduai 100 bawr vel chu tun nipuiah an hmu tawh tihna a ni a, transfer bazar-ah an che ṭha rih hle.

Blues hian Marc Guéhi (£20m), Victor Moses (£4.5m), Tino Livramento (£5.3m), Tammy Abraham (£34m), Ike Ugbo (£6.4m) leh Fikayo Tomori (£25m) chu man to zuala an hralh an ni a, man tlawm zawka chhuahtir an nei nual bawk.

Kum 29 mi Zappacosta hian kum 2017 khan Torino aṭangin Chelsea hi pound maktaduai 24-in a zawm a, a season hmasa berah inelna hrang hrangah match 35 inlan mah se a hnuah erawh a inlan tam zui lo.

AS Roma (2019-20) leh Genoa (2020-21) lamah te loan-a chhuahtir a ni a, FA Cup leh Europa League-ah Blues tan champion nomawi a chawi bawk.

Italy tana vawi 13 inlan thei defender hian 2014-15 season kha Atalanta tan hian a lo khel tawh a, Fiorentina lam pawhin an duh ve nia sawi ni mah se a club hluia kal a thlang ta zawk a ni.

Hetihlai hian Chelsea hian Tiémoué Bakayoko chu AC Milan lamah an kaltir dawn nia sawi a ni bawk a, French midfielder hian loan-in a zawm phawt ang a, a tawpah a ngheta lak theih dan a awm ang - season hmasa kha Napoli lamah loan-in a khel.