Harry Kane a chhuak dawn lo

Manchester City nena sawi-zawm Harry Kane chuan nimin tlai khan tun nipui transfer-a Tottenham Hotspur a chhuahsan loh tur thu a tichiang.

Kum 28 mi Kane chuan, "Pathiannia Spurs ṭantuten min dawn sawn dan kha ka lawm takzet a, kar liam ta khan min thlawpna thu tam tak ka dawng.

"Tottenham-ah ka cham dawn a, tun nipuiah ka chhuak dawn lo. Team-in hlawhtlinna an chan theih nan ka theihna zawng zawng ka chhuah ang," tiin a chhuah loh tur thu a sawi.

English striker hian June 2018 khan a contract chu kum 2024 thleng a pawtsei a, contract a la ngah avangin Spurs chairman Daniel Levy pawhin England captain hi a chhiar to hle - pound maktaduai 160 zet a chhiar niin an sawi.

Manchester City-in Sergio Aguero thlak nan Kane hi an duh a, an dawrna hnuhnung ber hi euro maktaduai 150 (£130m bawr vel) ni mah se Spurs hian an hnawl. Kane hian chairman Daniel Levy nen tun nipuia chhuak turin a thu phungin inremna an neiah a ngai a, amaherawhchu Spurs chairman hian Man City nen indawrna a kalpui duh lo.

Transfer indawrnaa tawhkhirh ber zinga mi Levy-a'n England captain chelh a tum miau avangin Kane tan cham tura thutlukna siam mai loh chu tih theih dang a awm loah a ngaih theih.

Kane hian Premier League golden boot vawi thum a dawng tawh a, mimal chawimawina ṭhahnem tak dawng tawh mah se nomawi a la chawi lo. English striker hian Spurs tan inelna hrang hrangah match 337 khel tawhin goal 221 a khung tawh a, Premier League bikah goal 166 a khung tawh bawk.