Goal ruk hmangin Arsenal an inhrosa

'Chak thei lo, goal khung thei lo, inkhel hmuhnawm lo bawk si' tia an selna chu Arsenal chuan goal ruk hmangin an chhanglet a, an mikhualna ramah West Bromwich Albion chu 6-0 a luhchhuahin EFL Third Round an lut.

Gunners tan hian Pierre-Emerick Aubameyang-a'n hattrick a siam, captain-in goal thum a khung bakah hian Nicolas Pepe, Bukayo Saka leh Alexandre Lacazette te chuan goal khat theuh an khung ve bawk.

Inkhel dangah Newcastle leh Burnley te goal awm loin an inhnehtawk a, penalty shootout-ah Magpies hi 4-3 in an chak lo. Southampton erawh chuan khualmualah Newport chu 8-0 teh meuhin an sawp ve thung.

A ṭha an khel
Premier League match hmasa pahnihna an tlawm avangin Arsenal dinhmun a chhe takzet a, manager Mikel Arteta chu archuk tui lo ang maia chhuah a ni mek, team boruak siamṭha turin chak an mamawh takzet.

Spanish manager hian a player neih ṭhat a chhawr. Aubameyang, Pepe leh Saka te tlarhmaah an intlar, anni thlawp tur hian Martin Odegaard a awm a, a ngheta an lakluh thar hnua bul a ṭanna hmasa ber a ni.

Granit Xhaka leh Mohamed Elneny te inkawp hnungah Rob Holding a ding a, goalkeeper thar Aaron Ramsdale pawhin a club thar tana a match hmasa ber a khel. Championship club lakah chak ngei tumin thapui an chhuah.

Valerian Ismael enkawlna hnuaia season bul ṭan fuh Baggies erawhin league an ngai pawimawh zawk. Player thar paruk ngawtin club tana an match hmasa ber an khel a, team nem zawk an nih sa bakah an ṭhat dan berin an inrem ve lo.

Laipui a puak
Goal khung theihna remchang nei hmasa zawk chu West Brom an ni. Minute 13-na lekah hla deuh tak aṭanga forward Tom Allen Fellows-a shot chu keeper Ramsdale-a'n a lo dansak hram a, thil thlen aṭanga minute li liam hnuah goal hmahruai a khung.

Gabon international hian Saka-a shot keeper lo danper chu hnai takah a khung. Odegaard leh Pepe ten goal ban an tihper a, a per let hi Auba bawkin a khung - chawlhlawk hma chiahin Pepe chuan Auba siamsak a khung ve thung.

Second half-ah pawh Gunners bawk an chungnung, midfielder Odegaard-a ball fing dawngtu Saka chuan tihsual nei miah loin a khung. Baggies lam a ngawi mai mai bik lo - Taylor Gardner-Hickman-a'n Ramsdale tan hna hautak vawi hnih a siamsak a, mahse English keeper hi a chesual duh lo.

Sawiselna kara leng mek Auba-a'n a la duhtawk bik lo, a thiam dan takin box sir lam aṭangin goal kilah a pet kum lut a, forward Pepe-a'n keeper chip khum mah se goal bar a per hlauh, Ivory Coast internaional hian Lacazette khung tur erawh a siamsak ta tho.

Arteta thukhawchang
Arsenal manager Mikel Arteta chuan, "Chak loh hnuah a rang thei ang bera insiamṭhat hi a pawimawh. Player ṭhenkhat tan tun season bika an match hmasa ber a ni a, hnehna kan chang hian inrintawkna min siam belh nasat ngai ka ring," tiin a sawi.

Auba leh Lacazette ten season ṭan hmain Covid-19 an kai a, league lamah Auba hian hun rei vak lo a khelh bak a la inlan lo. Real Madrid aṭanga an lak midfielder Odegaard tan pawh a match hmasa a ni a, tun kar tawpa Manchester City hma chhawn tura inbuatsaihna ṭha tak chu a ni ang.

Captain Auba chungchang sawin zuiin Arteta chuan, "Mi hlim thei tak a ni a, boruak ṭha a mamawh. Khemual chhungah a chet danah fans an lungawi, mual a chhuahsan dawna boruak khan a hlimna leh fans nen an inpawhna a nemnghet," a ti.

Kum 32 mi Aubameyang pawhin an khelh dana a lawmthu sawiin, "Player zawng zawng hian 100% theihna kan hlan reng, min ṭantute lawmna siam hi kan tum ber a ni. League-ah pawh match 36 khelh hmabak kan la neih hi a ṭha thei ang bera khelh kan tum ang," tiin a sawi ve bawk.