Hockey Mizoramin lawmpui dawn

Lalremsiami Hmar chu vawiin tlai dar 3:00 hian Aijal Club-ah Hockey Mizoram chuan sawm bik mi tlemte nen lawmpuina hun a hmang dawn a, harsatna kara an chher chhuah player hi lawmpuina thilpek an hlan nghal ang.

Hockey Mizoram hun hman hi United Sports Association of Mizoram (USAM) nena kalpui tur a ni dawn. Hockey chhungkua bakah coach leh player hlui ten hun an hmanpui dawn a ni.

Mizo nula Remsiami hi Thenzawl Hockey Training Center aṭanga inzir chhuak a ni a, Thenzawl aṭang hian India Junior team atana koh a ni. Tualchhung aṭanga inzir chhuak ni mah se Tokyo 2020 neih zawh takah khan India player pawimawh a ni phak.

Olympian Remsiami hian August 25, Nilaini khan Mizoram a lo thleng - September thla hian India camp a zawm leh nghal a ngai dawn. Hockey Mizoram chuan an player in chawlh a neih chhungin mipuite chu bawh buai nasa lo hram hram turin an ngen.