ISL khel tur East Bengal; Didi, i zunzam a ni!

Indian club hlun East Bengal chu an hma hun a chian loh reng hnuah Shree Cement nen an inrem leh thei ta a, season tharah Indian Super League an khel leh dawn.

Kolkata club ṭantuten lawmthu hrilh tur an nei a, a hming chu Mamata Banerjee a ni. West Bengal Chief Minister hian pawl pahnih hi an inrem theih loh hnuah Nilaini khan a ko a, 'Didi' hriatpuina hnuaiah an inrem.

East Bengal chuan nimin khan West Bengal chief minister Mamata chunga an lawmthu an puang a, "Kan chief minister zahawm tak Mamata hnenah lawmthu kan sawi a, fan-te pawh in hmangaihna avangin kan lawm e.

"Hun kan nei tlem tih kan hria a, mahse, team ṭha tak din tumin theihtawp kan chhuah ang - red & gold puanzar i chawisang zual zel ang u," an ti a, team ṭha tak din an tum thu an sawi tel.

A tirin
East Bengal hian I League lamah Quess Corp chu an lo thawhpui tawh ṭhin a, Quess nena an thawhdun hian an tum ber chu ISL khelh nia sawi a ni ṭhin - Quess hian 70% share an nei.

Kolkata club-in July 2018-a Quess Corp inremna an neih khan transfer bazar lamah na takin an che nghal a, Costa Rica tana World Cup khel zo hlim Jhonny Acosta leh Mexico international hlui Enrique Esqueda te chu an lakluh zingah an tel hial.

Mahse, Quess leh East Bengal hi an thawk ho rei hleithei lo a, club chhungkuaah buaina neuh neuh an nei reng - kum hnih an thawk ho hman awrh tihin Quess an inhnukdawk a, July 2020 khan East Bengal nena an thawhhona an titawp.

Hetihlai hian ATK leh Mohun Bagan an inzawm dawn tih a chiang tawh a, East Bengal fan-ten I League khelh an duh tawh bik lo. Football ngainatu Didi a lo lang a, dollar tluklehdingawn hnih chuang hausakna neitu Shree Cement chu East Bengal tana an sum theh chhuak turin a hminsak.

A hahthlak
Pawl pahnih inremna hnuaiah Shree Cement East Bengal Foundation tih chu din a ni a, cement hmanga sumdawng lian Shree lam hian 76% share neiin East Bengal-in 24% share an nei thung.

Pawl pahnih inremna hi inremna lailawk anga kalpui a ni a, club sporting rights te, a bungrua leh thil dang zawng zawng chu Shree Cement East Bengal Foundation thuneihna hnuaiah dah nghal vek a ni.

Mahse, he inremna hi inremna tak tak a nih loh avangin pawl pahnih hian contract thar ziak turin thla hmasa aṭang tawh khan hma an la a, an inrem thei lo.

East Bengal fans lamin club thuneitute an dem a, an inrem theih loh chhanah official-te an puh. July 21 phei kha chuan fans engemaw zat chu club office pawnah an pungkhawm a, buaina a chhuak hial.

A chhan
East Bengal fan-ten buaina an siam hma hian club executive committee chuan Shree Cement nen season thar atana inremna tur contract chu pawm loh an rel a, nikum lama an inremna leh tuna an inremna tura chhawpchhuah chu a inang lo niin an sawi.

Shree Cement lam erawhin inremna ziah tur chu season hmasa nen a danglamna a awm loh thu an sawi thung a, East Bengal thuneitute chu inremna tura an chhawpchhuahah a hma mi nena danglamna a awm a nih chuan ziaka chiang taka tarlanga an hnena thlen turin an ti.

August 16 khan Shree Cement hian East Bengal leh Mamata hnenah inremna tur lehkha an pe a, EB lamin an sign duh chuang lo. Pawisa nei zawk Shree Cement an lawm lo a, August 23 khan an inhnuhdawh thu Mamata an hrilh.

Mahse, Didi a awm mai mai lo - East Bengal fans ngahzia a hria a, West Bengal secretariat building Nabanna-ah pawl pahnih a ko a, mahni induhtawk ve tak pawl pahnih hi a inremtir a, lungawi takin an ṭin.

Didi, nang vang a ni!
Shree Cement chief financial officer (CFO) Subash Jajoo chuan, "ISL khelh ngei kan duh a, mahse, ngaihdan inang lo a awm avangin kan inrem thei lo. Mahse, Mamata-in min ngen avang chauha inrem leh kan ni," a ti.

East Bengal senior official Debabrata Sarkar chuan, "Mamata-i'n ISL kan khelh theih nan min pui a, Shree Cement chungah pawh lawmthu ka sawi a ni," a ti a, season hmasa an inremna angah khan an inrem leh phawt thu a sawi bawk.

Tuna zawhna awm chu East Bengal hian engtinnge team ṭha an din ang, tih hi a ni a, a harsa dawn. Chu chauh a ni lo - August 6 khan All India Football Federation (AIFF) chuan East Bengal hi Indian player Rakshit Dagar, Abhas Thapa leh Pintu Mahata te hlawh an pek zawh loh avangin transfer bazar-a che thei loin an hrem.

East Bengal-in player-te hlawh an bat zat hi nuai 12 bawr vel a ni a, hei erawh Shree nena an inrem hmaa contract an lo ziahpui tawh player-te an ni a, pawisa hi an pek tlak chuan transfer ban hi hlih nghal theih a ni.

Hun a tlem tawh!
East Bengal leh Shree Cement inrem a tlai hret a, season hmasa ang thoin team din turin hun an nei tlem - June 9 khan Indian football-ah transfer bazar hawn a ni a, August 31-ah a tawp tawh dawn.

Kolkata club hian bazar turin ni nga chiah an nei tawh tihna a ni a, a hautak dawn. Chutihrual chuan Indian football transfer-ah chuan player tam zawk hi free transfer-a chhuak an ni a, ram pawn player pawh hi man neia lakluh an awm meuh lo.

Free agent player chu transfer bazar tawp hnuah pawh lak theih an ni. Chutihrual chuan transfer tawp hmain club tam zawkin team an din tawh ṭhin a, bazar khar hnuah chuan player lei tur an tlem ṭhin.

East Bengal thuneitu zinga mi Debabrata Sarkar chuan, "Team tura ruahman sa kan nei tawh a, Shree Cement hian kan puih an mamawh a nih chuan theihtawp kan chhuah ho zel ang," a ti a, transfer bazar-ah harsatna an tawh a rin loh thu a sawi.