Guardiola-a'n Manchester City a chhuahsan dawn
Pep Guardiola chuan Manchester City-a a contract neih lai a hman zawh hunah English club a chhuahsan tur thu a sawi a, Spanish manager hian kum 2023 thleng daih contract a nei a ni.
Kum 50 mi manager hian Etihad Stadium-a kum sarih chhung hna a thawh hnuah hahchawlh a duh a, chumi zawh chuan ram team enkawl a châk thu a sawi.
Thutlukna a siam
Guardiola chuan, "Tawp hun ka neih a ngai. Kan hnathawh hi thlir ula, chawlh ka mamawh a ni. Remchang a awm a nih chuan ka hmachhawp chu ram team enkawl a ni," tiin a hmalam hun tur a sawi.
Ram team enkawl chungchang sawi zuiin Guardiola chuan, "South American ram emaw European ram emaw enkawl a chakâwm a, Copa America-a tawnhriat neih ve a châkawm a ni," tiin a sawi.
Pep Guardiola hian kum 2016 khan Man City hi a zawm a, season khatnaah nomawi a chawi lo. Tunah erawh Premier League nomawi pathum, FA Cup pakhat, League Cup pali leh Community Shield pahnih a chawipui tawh a, a hlawhtling hle.
Barca-ah a hlawhtling
Khawvel manager ṭha ber zinga mi Pep Guardiola hian ban a la tawk lo a, ama duhthu ngeiin ṭum hnih a chawl tawh. Pep-a'n senior team a enkawl hmasak ber chu a inzirchhuahna Barcelona a ni a, Catalan club hi a season hmasa berah treble champion a nihpui nghal.
Spanish manager hian Barca hi season li chhungin nomawi 14 - La Liga pathum, Copa Del Rey pahnih, Supercopa de España pathum, Champions League pahnih Super Cup pahnih leh FIFA Club World Cup pahnih a chawipui.
Pep hian kum khat chhung chawlh a hmang a, January 7, 2013-ah 2012 FIFA Ballon d'Or gala neih a ni a, FIFA World Coach of the Year-ah pathumna a dawng. Hemi ṭum hian Spanish manager hian coaching-a let a tum thu a sawi.
A hlawhtling zel
Bayern Munich-in January 16, 2013-ah Pep-a'n season tharah Jupp Heynckes a thlak tur thu an puang. Spanish manager hian treble champion team a enkawl zui avangin pressure a ngah a, Bayern khelh dan thlak hlawkin record a siam nasa hle.
Pep hian season thum chhungin Bayern hi nomawi pasarih - Bundesliga pathum, DFB Pokal pahnih, Supercup pakhat leh FIFA Club World Cup pakhat chawipui mah se Champions League nomawi a chawi lo. Spanish manager hian kum thum contract a ziah a hmang zo a, Allianz Arena a chhuahsan.
Spanish manager hian ban a la tawk lo a, a ruaitu club-ten chelh dan kawng an dap ṭhin zawk. Etihad Stadium-ah pawh hlawhtling viau mah se Man City-in an lak chhan ber Champions League nomawi an la chawi lo chungin a chhuak tur hi channa lian tak a ni thei ang.
Premier League nomawi chawi ngun ber manager chu Alex Ferguson a ni a, Manchester United chu vawi 13 zet a champion pui. Scottish manager record hi chu khum rual a ni lo a, amaherawhchu Pep hian season hnih a la neih avangin amah ang bawka vawi thum champion tawh José Mourinho leh Arsène Wenger te chungah a la awm thei ang.