FIFA President-in UK PM lehkha a thawn

Football khawvela thuneitu sang ber FIFA president Gianni Infantino chuan UK prime minister Boris Johnson hnenah lehkha a thawn a, zin haw inkhunghran ngai chungchangah English club-a khelte hrethiam turin a ngen.

September thla tirah international break a awm dawn a, mahse, England leh Spain-a club-te chuan an player-te ram tana an fehchhuah lama an haw hnuah inkhunghran leh a ngaih dawn avangin ram tana fehchhuah an phal lo.

Khawvel ram hrang hrang sorkar ten Covid-19 hluarna rama a ngaih 'red-list' an nei a, UK pawhin an red list-a chuang rama zin chhuak player-te chu an kir hunah ni 10 tal an inkhunghran a ngaihna tur dan an nei.

Heivang hian player-te chuan club tan match engemaw zat an khel thei dawn lo - hei hi ngai ngam loin Premier League club-te chuan international break-a player chhuahtir loh an rel a ni.

FIFA president Gianni Infantino chuan he thutluknain international football a nghawng theih dan tur a hria a, UK prime minister Boris Johnson chu lehkha a thawn ta a ni.

Infantino chuan, "Euro 2020 tawp lama an dan ang khan kal leh turin ka ngen a ni," a ti a, Euro tawp lamah khan UK sorkar chuan VIP-te chu inkhunghran kher ngai loa an rama an luh a phalsak.

FIFA hotupa chuan, "Kan hun liam taah khan inlungrual takin khawvel tibuaitu hri leng kan do ho a, kan hma hunah pawh kan tih zel ka beisei.

"FIFA hnuaia ram te, league leh club zawng zawngte chu football tana ṭha ber tura thutlukna siam turin ka ngen. Khawvela footballer ṭha ber berte chu England leh Spain-ah an khel a, heng ramte hian khawvel hmun hrang hranga football inelna zahawmna humhim hi an hna a ni ve bawk a ni," tiin a sawi.

UK sorkar aiawha thupuangtu chuan FIFA President lehkha chu an hmuh ngei thu a sawi a, "FIFA hnenah kan dan kal lai thlak danglam tumna kan neih loh thu kan hrilh a, mipui vantlang himna tur ngaihtuah chunga he dan hi nei kan ni," a ti a, Euro 2020 anga tih theih a nih loh chhan hi zin lut chhuak an tam dawn lutuk vang nia ngaih a ni.

Premier League chuan an league club-te chuan hrehawm ti tak chunga ram tana player-te fehchhuah tir loh an rel thu an sawi a, Football Association leh sorkar nen pawh inbiakna nei mah se awmzia a neih loh thu an sawi a ni.