Ronaldo-a'n khaw nge a pan dawn?

Kumin hi football bazar ngaihnawm ber ṭum a ni hial ang. Lionel Messi-a'n Barcelona a chhuahsan a, hei ringawt pawh hi a ropui tawk viau. Hemi belhchhah tur hian Jack Grealish, Romelu Lukaku leh Jadon Sancho ten Manchester City, Chelsea leh Manchester City an zawm a, man to tak vek an ni.

Club ṭan dan a zirin transfer lian tih a danglam thei a; Sergio Ramos, Raphael Varane, Gianluigi Donnarumma, Sergio Aguero, Ben White, Olivier Giroud, David Alaba leh player ṭha ṭhahnem takin club khelhna an sawn.

Hetichung hian transfer lian tham thleng thei tur a la awm cheu. Manchester City leh Cristiano Ronaldo te chu sawizawm an ni a, Real Madrid-in Kylian Mbappe lak an tum bawk. Transfer lian tham pahnih hi la thleng thei dinhmunah a ding.

Ronaldo a cham dawn?
Cristiano Ronaldo chuan instagram kaltlangin Juventus chhuahsan tur anga an sawi chu dawt thu mai a nih thu a sawi chhuak. Club vice chairman Pavel Nedved leh manager Massimiliano Allegri te pawhin Turin-a a cham tur thu an sawi.

Amaherawhchu Nedved hian manager aṭangin Andrea Pirlo an ban loh tur thu a sawi a, an ban ta tho. Chutiang bawkin Ronaldo chungchanga thuthang awm hi thuthang satliah chu a ni lo.

Cristiano Ronaldo agent Jorge Mendes chu Torino-ah a awm mek a, Portugal captain chhuah theihna tur club a zawng. Messi latu PSG chuan Ronaldo hi an duh lo. Mendes hian Man City a dawr a, amaherawhchu buaina a awm.

Juventus-in kum 36 mi Ronaldo manah euro maktaduai 30 an chhiar a, Manchester City-in a hlawh tam dan tur thlir tel ranin Portuguese forward manah hian sum pek an tum lo. Chutihrualin Sergio Aguero thlakna tura an hual Harry Kane-a'n Tottenham-ah a cham tur thu a tichiang a, Bayern-in Robert Lewandowski chhuah an phal lo. Man City-in striker ṭha nghah nana goal khung thei player lak an duh chuan Ronaldo hi a khan hle.

Pep Guardiola chuan Gabriel Jesus-a'n hmun pawimawh a chan tur thu a tichiang a, Ronaldo mana kal tel thei a ni dawn lo. Manchester City hian an duh a nih phawt chuan an hmelma Manchester United legend Ronaldo hi chu a la theiah a ngaih theih a, chumi thleng tur chuan Juventus nen an indawr a ṭul ang.

Mbappe hi
PSG-in Kylian Mbappe chelh duh mah se French forward hian contract thar a ziak duh tlat lo. Mbappe hian Real Madrid pan a duh a, La Liga club pawhin an duh. Los Blancos hian Mbappe lak tumin French club hi euro maktaduai 160-in an dawr.

PSG hian euro maktaduai 180-a an lakluh Mbappe hi an lakna aia tlawma hralh an tum lo a, PSG director Leonardo Araujo chuan, "Real-in Mbappe lak an tumna hi kan beisei zat nen chuan a la inhlat hle. An dawrna hmasa ber hi kan hnar a, kan beisei ang zat min pek erawh chuan kan pawm ang," tiin a sawi.

French club hian an phut zat chiah tarlang lo mah se euro maktaduai 200 chuang a nih dawn avangin sum lama talbuai Spanish club tan lak a harsa dawn. Leonardo chuan, "Real Madrid thil tum chu a chiang a ni. Theihtawp chhuah anga lan an duh a, kan remtih loh hi an duh. Nakkumah Mbappe hi a thlawna lakluh an duh a, chu chu an duh ber. Amah hian a thlawna chhuak lo turin a intiam a, chelh kan tum ang a, a contract kan pawtsei ang," tiin a sawi.

Real Madrid president Florentino Perez erawhin PSG-in an dilna bung taka an chhan thu a sawi a, Mbappe lak a awlsam dawn lo tih a hrechiang ang. Chutihrualin transfer hun a la tawp lo a, engmah a la chiang lo.