Bayern-in goal 'dozen' khat an khung

Bayern Munich chuan Nilaini zan khan DFB Pokal first round-ah Bremer SV chu 12-0 in an sawp a, Eric Maxim Choupo-Moting chuan goal li zet a khung.

Weserstadion-a inkhelah hian Bayern-in a khat mawi tawkin goal an khung reng a, chutihrualin German champion hmachhawn hi fifth division club an ni. Bremer tan chuan Bayern hmachhawn hrim hrim hi vanneihna a ni a, inkhelh banah pawh Bavarians ai mahin an lawm zawk.

Julian Nagelsmann-a hote tan hian Choupo-Moting-a'n minute 35 chhungin hattrick a siam tawh a, minute 82-naah a goal lina a khung. Rawlthar duhawm Jamal Musiala-a'n goal hnih a khung a, Bremer player Jan Luca Warm-a'n an lama a tih luh pawh Musiala thawhrah liau liau a ni.

Bavarians tan hian Malik Tilman, Leroy Sane, Michael Cuisance, Bouna Saar leh Corentin Tolisso ten goal khat ṭheuh an khung a, harsatna nei loin semifinal an lut.

German Cup-ah hian team 64 an tel a, Bayern leh Bremer inkhel hi Covid-19 vangin an sawn tlai a, ti hian first round an khel zo chiah. Second round draw hi August 29, Pathianni hian neih a ni ang a, October 26-27, 2021 chhunga khelh tur a ni ang.

Bayern ṭantuten Sane an au el leh a, Bundesliga inkhela Cologne an hneh ṭumin an au el tawh bawk. Manchester City forward hlui an au elna chhan hi a khelh ṭhat tawk loh vang a ni ber a, a man tam vang leh a hlawh tam vanga rawn irh chhuakah a ngaih theih.

Julian Nagelsmann chuan, "Auh elna kan hre leh a, kan tih theih bak a ni. Leroy hi an inpe em em a, hmasawnna tur a la ngah. A tih theih leh theih loh kan zir chiang ang a, a ṭhat dan bera chhawr kan tum ang," tiin a sawi. Bayern sporting director Hasan 'Brazzo' Salihamidzic pawhin Sane chu a thlawp tlat thu leh a au eltute a dem thu a sawi bawk.

August 25, Nilaini
Bremer 0 - 12 Bayern Munich
FCB : Eric Maxim Choupo-Moting 8', 28, 35', 82'; Jamal Musiala 16', 48'; Jan Luca Warm 27' (OG); Malik Tilman 47'; Leroy Sane 65'; Michael Cuisance 80'; Bouna Saar 86'; Corentin Tolisso 88'