Mourinho-a'n Inter Milan a chhaih

AS Roma manager Jose Mourinho chuan an elpui Inter Milan chu ṭawngkam hmanga chhaih buai a tum nghal niin a lang, team dang zawng aiin Inter tan insiamremna hun a ngaih tlem a rin thu a sawi.

Serie A champion Inter hian an striker ṭha Romelu Lukaku leh defender pawimawh Achraf Hakimi te an chan a, mahse an league match hmasa berah an buai lo, an mikhual Genoa chu 4-0 in an sawp.

Inter ang bawkin Mourinho enkawl Roma pawh an chak a, mahse Portuguese manager hian team dang tan chuan insiamremna hun a ngai rei hret dawn niin a sawi. Champion team chhawmtu Simone Inzaghi tan hna a awlsam bik a ring.

Mourinho chuan, "Manager thar kan tam, thla hnih pawh tling lo kan enkawl hman chauh tihah Serie A kan khelh ṭan nghal a ngai a, hnathawh ngai leh siamrem tur tam tak kan neih hi vawi lehkhata tih fel duak theih a ni lo.

"Chutih rualin Inter erawh season hmasa lama ṭha taka lo khel tawh an ni a, player tin ten an hnathawh tur chin an hre bel hneh hle, an payer ṭhenkhat chhuak awm mah se midang ai chuan insiamrem turin hun an mamawh tlem bik ang," tiin a sawi.

Champion lai Inter hian zanin dar 12:30 hian Verona an lenchilh dawn a, manager ngaihnawm Mourinho enkawl Roma hian Pathianni zanah kai thar Salernitana an lenchilh ve thung ang.